Ordu.az xəbər verir ki, bu barədə belçikalı deputat Brüsseldə “Armenpress”ə müsahibəsində danışıb.
Deputat bildirib ki, bu proses həm siyasi müşayiətin gücləndirilməsi, həm də Ermənistan üçün real Avropa strateji baxışının başlanğıcı kimi qiymətləndirilməlidir.
“Bu, hər ikisidir. İlk növbədə siyasi vəziyyətin aydın şəkildə gücləndirilməsidir, çünki ilk dəfə Avropa Siyasi Birliyinin sammiti İrəvanda keçiriləcək. Növbəti gün isə Ermənistanla Avropa İttifaqı arasında sammit olacaq”, - deyə o qeyd edib.
Onun sözlərinə görə, bu, xüsusilə təhlükəsizlik və regionda sabitlik məsələlərinin məhz İrəvanda müzakirə olunacağı nəzərə alınarsa, son dərəcə güclü siyasi siqnaldır.
Belçikalı deputat qeyd edib ki, məqsəd yalnız siyasi jestlə kifayətlənmək deyil, həm də Avropa İttifaqı ilə Ermənistan arasında strateji tərəfdaşlığı daha da dərinləşdirməkdir.
“Bu, həm də Avropa İttifaqı ilə Ermənistan arasında daha mühüm strateji tərəfdaşlığın başlanğıcıdır. Mən düşünürəm ki, burada hər iki element var: həm çox güclü siyasi siqnal, həm də gələcək strateji əməkdaşlığın başlanğıcı”, - deyə o vurğulayıb.
Onun fikrincə, sülh sazişi yalnız imzalanmaqla kifayətlənməməli, eyni zamanda real təminatlarla dəstəklənməlidir.
“Bir tərəfdən sülh var, bu sülh təsdiqlənməli və rəsmi şəkildə imzalanmalıdır. Digər tərəfdən isə, əlbəttə ki, bu, kifayət qədər zəmanətlərlə müşayiət olunmalıdır”, - deputat deyib.
O əlavə edib ki, bu cür təminatları Ermənistanın çoxtərəfli tərəfdaşları, o cümlədən ölkədə fəaliyyət göstərən Avropa missiyası verə bilər.
De Maeqd hesab edir ki, Avropa İttifaqının Ermənistana dəstək vermək üçün kifayət qədər siyasi alətləri var və yaxınlaşma təkcə ritorika deyil.
“Əgər Avropa İttifaqı Avropa Siyasi Birliyinin sammitini məhz orada keçirmək qərarı verirsə, bu artıq güclü siqnaldır. Və bu siqnalın arxasınca əməli addımlar gəlməsə, bu, tamamilə mənasız olar”, - deyə o bildirib.
Deputat əlavə edib ki, onun qətnaməsi də məhz Belçika hökumətindən bu siyasi siqnalların konkret addımlarla davam etdirilməsini tələb edir.
“Bu qətnamənin mənası da elə bundan ibarətdir: Belçika hökuməti təmin etməlidir ki, bu siqnalların arxasınca real addımlar gəlsin”, - deyə Maeqd vurğulayıb.
Alpər Mövludoğlu
Ordu.az
