Ordu.az xəbər verir ki, bunu energetika məsələləri üzrə erməni ekspert Vahe Davtyan deyib.
“Görünür ki, sərhədimizin şimal-şərq hissələrində dəyişikliklər gözlənilir.
Hələ 2024-cü ildə keçirilmiş ilk mərhələdən sonra aydın oldu ki, Ermənistanın qaz nəqli sistemi üçün mühüm əhəmiyyət daşıyan Qırmızı körpü-Sevkar-Berd qovşağı üçün kifayət qədər riskli şərait yaranır. Bu qaz kəməri Azərbaycanın əlçatanlıq zonasına düşdü və bu da enerji sahəsində təhlükəsizlik riskləri yaratdı.
Bundan əlavə, Gürcüstan bir neçə il əvvəl qaz kəmərinin bu hissəsini strateji obyektlər siyahısından çıxararaq satış prosesinə başlayıb. Məlumdur ki, Azərbaycanın SOCAR şirkəti ilk reaksiya verənlərdən biri olub və həmin hissəni əldə etmək üçün gürcü tərəfə ikiqat məbləğ ödəməyə hazır olduğunu bildirib”, - deyə o qeyd edib.
Davtyan bildirib ki, Gürcüstanın qaz nəqli sistemində əsas rol oynayan SOCAR ardıcıl olaraq ölkənin qaz nəqli infrastrukturunu əldə edir.
“Problemin kökləri, gürcü tərəfinin bildirdiyinə görə, 1990-cı illərə gedib çıxır. Həmin dövrdə Ermənistan-Gürcüstan-Azərbaycan sərhəd keçid məntəqəsi minalanırdı. Bu, reallığa uyğundur. Lakin sual yaranır: əgər bu boru xətti bütün bu müddət ərzində istismar olunubsa, niyə məsələ indi qaldırılır? Niyə indi deyilir ki, boru kəmərinin 5,5 kilometrlik hissəsinin köçürülməsi Ermənistanın enerji təhlükəsizliyini artıracaq?
Aydındır ki, bu hissənin minalanması ilə bağlı risklərlə yanaşı, Ermənistan bu arqumentdən rəsmi bəhanə kimi istifadə edərək boru kəmərinin logistikasını dəyişmək istəyir”, - deyə o qeyd edib.
Davtyan vurğulayıb ki, bu isə təhlükəli presedent yarada bilər, çünki gözlənilən delimitasiya və demarkasiya işləri Ermənistan-İran qaz kəməri və İran-Ermənistan yüksək gərginlikli elektrik xətləri, o cümlədən hazırda tikilən üçüncü yüksək gərginlikli xətt layihəsi kimi mühüm infrastruktur obyektlərini də oxşar riskli vəziyyətə sala bilər.
“Bu yanaşma Ermənistanın güzəştlərə getməsini və öz mühüm infrastrukturunu yenidən təşkil etməsini diktə edirmi? Bu, məğlubiyyətçi yanaşmadır və çoxsaylı milli təhlükəsizlik riskləri yaradır.
Qaz kəmərinin logistikasının dəyişdirilməsi məsələsi regionda geosiyasi proseslərin mühüm göstəricisidir. Bu qərar hakimiyyətin “sülh artıq təmin olunub” tezisləri ilə uzlaşmır. Əksinə, bu, regionda sülhün hələ çox uzaq olduğunu göstərir”, - deyə erməni ekspert qeyd edib.
Davtyan xatırladıb ki, Ermənistan Gürcüstan ərazisindən ildə təxminən 2,3 milyard kubmetr təbii qaz alır.
“Bu qaz Şimali Qafqaz-Cənubi Qafqaz marşrutu ilə nəql olunur və Qırmızı körpü-Sevkar-Berd qaz kəmərinə birləşir. Bunun sayəsində Ermənistanda elektrik enerjisinin təxminən 40%-i istehsal olunur.
Xarici təzyiq altında qaz nəqli sistemində edilən dəyişikliklər, əgər bu tendensiya davam edərsə, uzunmüddətli və çox təhlükəli nəticələrə səbəb ola bilər”, - deyə o qeyd edib.
Alpər Mövludoğlu
Ordu.az
