Ordu.az xəbər verir ki, “ThyssenKrupp Marine Systems” (TKMS) Sinqapurun Müdafiə Elm və Texnologiya Agentliyi (DSTA) tərəfindən Sinqapur Hərbi Dəniz Qüvvələrində (RSN) xidmətdə olan, “Invincible” sinfi kimi tanınan 2 əlavə “Type 218SG” sualtı qayığının inşası üçün müqavilə imzaladığını açıqlayıb.

Sifariş RSN-nin “Invincible” sinfinə məxsus sualtı qayıqlarının ümumi sayını 6-ya çatdıracaq. Bu çərçivədə ilk 2 sualtı qayıq 2024-cü ilin sentyabrında xidmətə daxil olub.

“Type 218SG” dizaynı TKMS-in ixrac yönümlü “Type 214” sualtı qayığının törəməsidir, bəzi dizayn xüsusiyyətləri (məsələn, dayaz sahil sularında təkmilləşdirilmiş manevr qabiliyyəti üçün X formalı sükan bölməsi) “Type 212” dizaynından götürülüb.

ESD-nin məlumatına görə, “Type 218SG” 6,3 metr enə, 70 metr uzunluğa malikdir. 2200 ton subasımı qabiliyyətinə malik sualtı qayıq səthə çıxdıqda təqribən 10 düyün (19 km/saat), su altında qaldıqda isə 15 düyün (28 km/saat) sürətə çata bilir.

Sevinc Əliyeva
Ordu.az