Ordu.az xəbər verir ki, İspaniya Daxili İşlər Nazirliyi Pireney yarımadasının böyük hissəsində elektrik enerjisinin kəsilməsindən sonra fövqəladə vəziyyət elan edib.

Nazirlik bəyan edib ki, fövqəladə vəziyyət rejimi tələb olunan bölgələrdə tətbiq olunacaq. İndiyədək Madrid, Andalusiya və Ekstremadura bölgələri mərkəzi hökumətdən ictimai asayişi və digər inzibati funksiyaları öz üzərinə götürməsini tələb ediblər.

İspaniyanın “Red Electrica” elektrik şirkəti bildirir ki, Portuqaliyaya da təsir edən böyük elektrik kəsilməsindən sonra ölkənin əksər hissəsinin elektrik enerjisinin bərpası 6 ilə 10 saat çəkə bilər. Şirkət kəsilmənin səbəbləri ilə bağlı spekulyasiya etməkdən imtina edib. Əməliyyat rəhbəri Eduardo Prieto jurnalistlərə bildirib ki, hadisə müstəsna və fövqəladədir, görünməmiş hadisədir.

İspaniyanın Baş Naziri Pedro Sançes deyib ki, fasilə Avropa elektrik şəbəkəsindəki “güclü rəqs” nəticəsində baş verib, lakin dəqiq səbəb hələ müəyyən edilməyib. Sançes ictimaiyyətdən fərziyyələrdən qaçmağı və yalnız fövqəladə hallarda müvafiq xidmətlərə zəng etməyi xahiş edib.

Bu hadisə martın 20-də Böyük Britaniyanın “Hitrou” hava limanında baş vermiş yanğından sonra altı həftədən az müddətdə Avropada ikinci böyük elektrik kəsilməsi olub. Kəsilmə Avropa ölkələrinin Rusiyanın dəstəklədiyi təxribat təhlükələrinə qarşı tədbir gördüyü bir vaxta təsadüf edir.

Səlahiyyətlilər kəsilmənin dəqiq səbəbinin hələ məlum olmadığını bildiriblər. Bununla belə, Portuqaliya hakimiyyəti problemin İspaniyadakı elektrik paylayıcı şəbəkədən qaynaqlandığını bəyan edib.

Portuqaliya hökuməti Baş nazirin iqamətgahında fövqəladə iclas keçirərkən, İspaniyanın Baş naziri “Red Electrica”ya baş çəkib və şəbəkə əməliyyatlarını bərpa etmək üçün səyləri yerində yoxlayıb.

İki ölkənin ümumi əhalisi 50 milyondan çoxdur. Bununla belə, kəsintidən neçə nəfərin zərər çəkdiyi hələlik bəlli deyil.

Belə geniş yayılmış elektrik kəsilməsi Pireney yarımadasında nadir hallarda baş verib. “Red Electrica” hadisənin araşdırıldığını bildirib.

Bir neçə saat ərzində İspaniyanın elektrik şəbəkəsi operatoru yarımadanın şimal və cənub hissələrində elektrik enerjisinin verilişinin tədricən bərpa olunduğunu və elektrik enerjisinin bütün ölkə üzrə tədricən normallaşacağını bildirib.

Sevinc Əliyeva
Ordu.az