Ordu.az xəbər verir ki, saziş “Eurosatory 2026” sərgisi çərçivəsində imzalanıb.

Razılaşmaya əsasən, tərəflər K9 haubitsalarının Yaxın Şərq bazarı üçün yerli istehsalı, texniki xidmət fəaliyyəti və texnologiya transferi istiqamətlərində birgə fəaliyyət göstərəcəklər.

“Hanwha Aerospace” bildirib ki, bu əməkdaşlıq şirkətin Yaxın Şərqdəki mövcudluğunu gücləndirmək strategiyasının bir hissəsidir. Şirkət regiondakı müştərilərə daha yaxın logistika dəstəyi göstərməyi, həmçinin istehsal və məhsulun istismar dövrü ərzində dəstək fəaliyyətlərini lokallaşdırmağı hədəfləyir.

“Generation 5 Holding” şirkətinin baş direktoru Xəlifə Murad Əl-Bluşi qeyd edib ki, saziş qabaqcıl müdafiə texnologiyalarının yerli sənayeyə transferinə mühüm töhfə verəcək. “Hanwha Aerospace” ilə əməkdaşlığımız texnologiya transferi və qabaqcıl istehsal imkanlarının əldə olunması baxımından vacib addımdır”, - deyə o bildirib.

Əl-Bluşi əlavə edib ki, şirkətin mövcud istehsal infrastrukturu və sənaye imkanları yüksək performanslı haubitsa sistemlərinin hazırlanması və istehsalı üçün əlverişli şərait yaradır.

“Hanwha Aerospace” şirkətinin Yaxın Şərq və Şimali Afrika üzrə regional rəhbəri İl Sunq isə Yaxın Şərqin şirkət üçün prioritet bazarlardan biri olduğunu vurğulayıb.

Onun sözlərinə görə, K9 sistemlərinin yerli istehsalı və dəstəyi tərəfdaş ölkələrin müdafiə müstəqilliyini gücləndirməyə və region müştərilərinə yerində xidmət göstərməyə imkan verəcək.

155 mm çaplı və 52 çap uzunluğunda lüləyə malik K9 özüyeriyən haubitsası 40 kilometrdən artıq atəş məsafəsinə malikdir. Sistem hazırda Avropa, Asiya və Okeaniya daxil olmaqla dörd qitədə yerləşən 10 ölkənin arsenalında istifadə olunur.

Şirkət hesab edir ki, regional sənaye tərəfdaşlıqları Yaxın Şərqdə müdafiə sənayesinin inkişafına və yerli istehsal potensialının artırılmasına mühüm töhfə verəcək.

Sevinc Əliyeva
Ordu.az