Ordu.az xəbər verir ki, bu barədə Ermənistanın “Past” nəşri yazıb.

Nəşr qeyd edib ki, Ukraynada davam edən müharibə yeni dünya düzəninin formalaşması baxımından məhək daşıdır.

“Müharibədə tərəflərdən birinin tam qələbəsi görünməsə də, Rusiya Silahlı Qüvvələri zaman-zaman nəzərəçarpacaq irəliləyişlər əldə edir. Təbii ki, müharibənin hansı şərtlərlə başa çatacağı çox vacibdir. Təsadüfi deyil ki, Putin Ukraynada sülh üçün Rusiya tərəfinin əvvəllər rədd edilən şərtlərini növbəti dəfə irəli sürdü. Bu tələblərə əsasən, Ukrayna ordusu rusların işğalı altında olan Donetsk, Luqansk, Zaporojye və Xerson vilayətlərindən geri çəkilməlidir. Kiyev NATO-ya üzvlük perspektivindən də imtina etməlidir. Lakin Ukrayna Qərbin dəstəyi ilə Rusiyanın təkliflərini rədd edir. Digər tərəfdən, aydındır ki, Qərbin sanksiya siyasəti öz nəticəsini verməyib, Rusiya iqtisadiyyatı nəinki tükənməyib, həm də böyüməkdə davam edir.

Analitiklər hətta qeyd edirlər ki, bu il Rusiya iqtisadiyyatı, məsələn, ABŞ iqtisadiyyatından daha yüksək artım təmin edəcək. Rusiya nəinki iqtisadiyyatı hərbi relslərin üzərinə qoya bildi, həm də ixracatını şərqə, xüsusən də Çin və Hindistana yönləndirə bildi. Eyni zamanda, Rusiyaya qarşı yeni sanksiyaların tətbiqi ilə bağlı Qərbdə birlik yoxdur. Məsələn, Almaniya hökuməti Aİ-nin Rusiyaya qarşı G7 sammitinin əvvəlində təsdiqlənməsi nəzərdə tutulan yeni sanksiyalar paketi üzrə danışıqları gecikdirir. İyunun 15-16-da İsveçrədə Ukraynada sülhə dair beynəlxalq konfrans keçirilib, onun gündəmində də Ukraynaya dəstək olub, amma proses göstərib ki, bunun böyük nəticələri olacağına demək olar heç bir gözlənti yoxdur. Problem ondadır ki, Rusiya, Çin və digər mühüm dövlətlər həmin konfransda iştirak etməyiblər. Buna görə də praktiki münaqişələr ola biləcək Ukrayna məsələsi ilə bağlı ikinci konfransda Rusiya və Çinin iştirak edəcəyi gözlənilir.

Digər tərəfdən, beynəlxalq münasibətlərdə müxtəlif bloklar vasitəsilə iş getdikcə aktivləşir. İtaliyada G7 ölkələrinin sammiti keçirilib, onun çərçivəsində cari əsas məsələlər müzakirə olunub. Türkiyənin ambisiyaları Qərblə bağlı deyil. Bu ölkənin Aİ-yə üzvlüyü məsələsi ikinci plana atılıb, əvəzində başqa məqsədlər ön plana çıxıb. Ankara bir tərəfdən İslam dünyasında nüfuzunu yaymağa çalışır, buna görə də İsrailə qarşı sərt mövqe tutur, digər tərəfdən isə türkçülük planlarını həyata keçirməyə başlayır. Ermənistana qarşı aqressiv siyasət və Zəngəzur dəhlizi məsələsinin irəli sürülməsi buna sübutdur”, - deyə nəşr bildirib.

Alpər Mövludoğlu
Ordu.az