İyul döyüşlərində şəhadətə yüksələn şəhid gizir İlqar Zeynallı

2021/07/14-4878788955.jpg
Oxunub: 2981     15:45     14 İyul 2021    
Zeynallı İlqar Ayaz oğlu 9 iyul 1995-ci il tarixində Tovuz rayonu Cəlilli kəndində anadan olub. Həmin kənddə yerləşən məktəbdə orta təhsil alıb. Orta məktəbi bitirdikdən sonra Tibb Universitetinin Hərbi Tibb Fakültəsinə daxil olub. Hərbi həkim işi ixtisasına yiyələndikdən sonra Beyləqanda feldşer(hərbi həkim) kimi xidmətə başlayıb. Aprel döyüşlərinin fəal iştirakçılarından olub və neçə-neçə yaralı döyüş yoldaşlarına vaxtında ilkin tibbi yardım edib. 2018-ci ildən Tovuz rayonunda xidmətinə davam edib.

İlqar Zeynallı Azərbaycan Silahlı Qüvvələrinin giziri idi. O, 2020-ci il iyulun 14-də Tovuz istiqamətində gedən şiddətli döyüşlər zamanı şəhid olub.

İlqar Zeynallı ölümündən 5 gün əvvəl ailə üzvləri ilə birgə ad gününü qeyd edib. O, həmin ərəfədə məzuniyyətə çıxmalı olsa da, gərgin döyüşlərə görə məzuniyyətini təxirə salıb.

Şəhidin qardaşı Sənan Zeynallı deyir ki, xəbər ona çatanda İlqarı yaralı görməyi arzulayıb: “Düşündüm ki, kaş yaralı olardı. Əli-ayağı olmayaydı, onu çiynimdə daşıyardım, amma bilərdim ki, canı üstündədir”.

İlqarın hərbçi olmasını, bu yolu seçməsini atası Ayaz Zeynalov istəyib. İndi onun yoxluğundan danışmaq Ayaz bəy üçün hər nə qədər çətin olsa da, ata məğrurluğunu itirmir: “Biz vətən üçün övlad böyütmüşük”.








Ordu.az


© Materiallardan istifadə edərkən hiperlinklə istinad olunmalıdır


Teqlər: Gizir   İlqar-Zeynallı   Şəhid  


Bizi "telegram"da izləyin