Ordu.az xəbər verir ki, bu barədə ABŞ ordusunun yaydığı məlumatda bildirilib.
Məlumata görə, avtonom insansız dəniz platformaları yaxın zamanda keçirilən hərbi təlim zamanı ABŞ-yə məxsus hərbi gəmilərdən birini müşayiət edib.
ABŞ ordusunun 25-ci Piyada Diviziyasının 125-ci Kəşfiyyat və Radioelektron Mübarizə Taborunun hərbçiləri Filippin Ordusu ilə birlikdə keçirilən təlim zamanı Kasiquran-Saund körfəzində insansız dəniz platformalarını tətbiq ediblər.
2026-cı ilin iyun ayında yayımlanan rəsmi bülletendə qeyd olunub ki, insansız dəniz platformaları Kasıquran limanına yaxınlaşan ABŞ ordusunun Logistika Dəstək Gəmisinin önündə hərəkət edərək ətraf mühiti müşahidə edib və əldə olunan məlumatları qurudakı şəxsi heyətə ötürüblər.
“Defense News” nəşrinin məlumatına görə, sözügedən fəaliyyət “Salaknib 2026” hərbi təliminin bir hissəsi kimi həyata keçirilib.
Təlim çərçivəsində Filippin Ordusunun şəxsi heyətinin və texnikasının, o cümlədən zirehli personal daşıyıcılarının 400 kilometrdən artıq məsafədə yerləşən Kasıquran limanına daşınmasına dəstək verilib.
Bildirilir ki, insansız dəniz platformaları üzərlərində quraşdırılmış sensorlardan istifadə edərək potensial təhdidləri müəyyənləşdirib və komandirlərə əməliyyat mühitinin fasiləsiz görüntüsünü təqdim etmək məqsədilə avtonom rejimdə fəaliyyət göstəriblər.
Təlimdə iştirak edən hərbçi Kaleb Hanna proses barədə danışarkən bildirib: “Bu gün desant gəmisinin təhlükəsizliyini təmin etmək üçün avtonom kəşfiyyat, müşahidə və rekognoska qayıqlarından istifadə etdik. Onlar Logistika Dəstək Gəmisini təxminən altı mil məsafədən limana qədər müşayiət edərək Filippin hərbi texnikasının və nəqliyyat vasitələrinin təhlükəsiz şəkildə körpüyə çıxmasına imkan yaratdılar”.
Qeyd olunur ki, bu sınaq ABŞ ordusunun Hind-Sakit okean regionunda insansız dəniz platformaları parkını genişləndirdiyi dövrə təsadüf edir.
Bu ilin əvvəlində ABŞ Hərbi Dəniz Qüvvələrinin rəsmilərindən biri bildirmişdi ki, hazırda təxminən dörd platformadan ibarət olan orta sinfinə məxsus insansız dəniz platformaları parkının 2030-cu ilə qədər 30-dan çox platformaya çatdırılması planlaşdırılır. Bu proses minlərlə kiçik ölçülü insansız dəniz platforması və pilotsuz uçuş aparatı sistemləri ilə birlikdə həyata keçiriləcək.
Sevinc Əliyeva
Ordu.az
