Ordu.az xəbər verir ki, bu barədə Səudiyyə Ərəbistanının dövlət xəbər agentliyi SPA məlumat yayıb.
Korvetin suya buraxılması mərasimi 2026-cı il iyunun 19-da korpusun yığılması mərhələsinin tamamlanmasından sonra baş tutub. Bundan sonra gəmi sistemlərin inteqrasiyası, liman sınaqları və dəniz sınaqları mərhələlərinə keçəcək.
HMS “AlMadinah” İspaniyanın “Navantia” şirkəti tərəfindən hazırlanmış “Avante 2200” layihəsinə məxsus üç çoxməqsədli döyüş gəmisindən biridir. Bu layihə çərçivəsində Səudiyyə Ərəbistanı Hərbi Dəniz Qüvvələri HMS “Neom” və HMS “AlUla” gəmilərini də əldə edəcək.
Səudiyyə Ərəbistanı bu gəmilərin tədarükü üçün “Navantia” ilə müqaviləni 2024-cü ilin dekabrında imzalayıb. Bu müqavilə daha əvvəl donanmaya beş döyüş gəmisinin verilməsini nəzərdə tutan proqramın davamı hesab olunur.
Layihə qrafikə uyğun şəkildə icra edilir. İkinci və üçüncü gəmilərin inşasının bir hissəsinin Səudiyyə Ərəbistanında həyata keçirilməsi planlaşdırılır. İşlərdə “Saudi Arabian Military Industries” şirkəti də iştirak edəcək və gəmilərin silah sistemləri ilə Hazm döyüş idarəetmə sisteminin inteqrasiyasını həyata keçirəcək.
Qeyd edək ki, Səudiyyə Ərəbistanı bundan əvvəl də bu layihə üzrə korvetlər sifariş edib.
Kral Səudiyyə Ərəbistanı Hərbi Dəniz Qüvvələri üçün “Avante 2200” korvet proqramı donanmanın genişmiqyaslı modernləşdirilməsini nəzərdə tutan “Al-Sarawat” layihəsi çərçivəsində başladılıb. İlk müqavilə beş gəmini əhatə edirdi və onlar İspaniyanın Kadis və San Fernando şəhərlərində yerləşən “Navantia” gəmiqayrma zavodlarında inşa olunub.
Gəmilərin tikintisinə 2019-cu ildə başlanılıb, seriyanın ilk korveti isə 2020-ci ildə suya buraxılıb. Sonrakı gəmilər bir neçə aylıq fasilələrlə istismara verilib və bununla da çoxməqsədli döyüş gəmilərindən ibarət tam seriya qısa müddətdə formalaşdırılıb. İlk partiyanın sonuncu gəmisi 2024-cü ildə donanmaya təhvil verilib.
Hər bir korvet tam istehsal dövründən keçib. Bu prosesə metalın kəsilməsi, blokların hazırlanması, korpusun yığılması, döyüş sistemlərinin inteqrasiyası, liman və dəniz sınaqları daxildir. Silah və idarəetmə sistemlərinin əhəmiyyətli hissəsi Səudiyyə Ərəbistanı və İspaniya şirkətlərinin birgə əməkdaşlığı çərçivəsində hazırlanıb.
Korvetin əsas taktiki-texniki xüsusiyyətləri:
Subasımı qabiliyyəti - 2500 ton,
Uzunluğu - 98,9 metr,
Maksimal sürəti - 25 düyün,
Ekipajı - 92 nəfər.
Silahlanmasına 76 millimetrlik “Leonardo Super Rapid” artilleriya qurğusu, 35 millimetrlik “Rheinmetall Oerlikon Millennium” zenit artilleriya sistemi, dörd “Boeing Harpoon Block II” gəmi əleyhinə raket buraxılış qurğusu, 16 ədəd “Raytheon ESSM” hava hücumundan müdafiə raketi üçün şaquli buraxılış qurğusu, iki üçlü 324 millimetrlik torpedo aparatı və iki uzaqdan idarə olunan döyüş modulu daxildir.
Sevinc Əliyeva
Ordu.az
