Ordu.az xəbər verir ki, bu barədə Ukraynanın 39-cu Zenit Raket Alayının “Posipaky” zenit PUA bölməsinin komandiri, “Ramzes” çağırış nişanlı hərbçi “Militarnyi” nəşrinə müsahibəsində bildirib.
Onun sözlərinə görə, hazırda istifadə olunan önləyici PUA-lar reaktiv mühərrikli hədəfləri etibarlı şəkildə vurmaq üçün lazım olan sürət göstəricilərinə malik deyil.
Bununla yanaşı, o qeyd edib ki, Ukraynada artıq yeni sistemlər hazırlanır və onların yaxın vaxtlarda silahlanmaya qəbul edilərək yüksək sürətli PUA-ların qarşısını ala biləcəyi gözlənilir.
“Hazırda bu imkan sistemli xarakter daşımır. Uğurlu məhvetmə halları əsasən şans, operator bacarığı və təcrübəsindən asılıdır. Operatorlar bilirlər ki, PUA manevr etdikdə sürət itirir və həmin an onu vurmaq mümkün olur”, - deyə o bildirib.
Hərbçinin sözlərinə görə, əsas problem reaktiv mühərrikli PUA-ların saatda 300 kilometrdən artıq sürətlə uçmasıdır. Hədəfi effektiv şəkildə tutmaq üçün önləyici PUA-nın təxminən 25 faiz daha sürətli olması tələb olunur.
“Əgər ‘Shahed’ saatda 300 kilometr sürətlə uçursa, bizim önləyici PUA isə 310 kilometr sürət yığırsa, məsələn, onu Xarkov vilayətində izləməyə başlasaq, cəmi 10 kilometrlik sürət üstünlüyü ilə ona yalnız Çerkası vilayətində çata bilərik. Bu vaxta qədər isə batareya çoxdan bitmiş olacaq”, - deyə o izah edib.
“Ramzes” vurğulayıb ki, hətta porşenli mühərriklə təchiz olunan “Shahed” PUA-ları da asan hədəf hesab olunmur. Belə aparatların sürəti adətən saatda 200-250 kilometr təşkil edir və önləyici heyət düzgün mövqe seçməzsə, batareya hədəfə çatmamış tükənə bilər.
“Tutma tapşırığı ilə havaya qalxırsınız və artıq batareyanızın enerjisi azalır. Bəzən hədəfə daha yaxın yerləşən digər heyət onu sizdən əvvəl vurur. Siz havaya qalxır, hədəfi aşkarlayır, vizual təsdiqləyir və sonra anlayırsınız ki, batareya ehtiyatınız kifayət etmir. Bu çox mürəkkəb tapşırıqdır. İnsanlar düşünməməlidirlər ki, ‘Shahed’lərin vurulması asandır. Bunun üçün yalnız önləyici heyətlər deyil, komanda məntəqələri, müşahidə və məlumat ötürən qruplar, həmçinin qonşu bölmələr arasında koordinasiya tələb olunur”, - deyə o bildirib.
Onun sözlərinə görə, digər ciddi problem hava şəraitindən asılılıqdır. Yağış, duman və aşağı buludlu hava şəraiti operatorların hədəfi vizual aşkarlamasını və izləməsini ciddi şəkildə çətinləşdirir.
“Bizimlə çalışan ekipajların əksəriyyəti əlverişli hava şəraitində demək olar ki, bütün hücum dalğalarını zərərsizləşdirə bilir. Lakin vizual aşkarlama hələ də vacibdir. Son mərhələ yönləndirmə sistemləri olan PUA-lar tətbiq olunsa da, əlverişsiz hava şəraitində onlar da hədəfin tutulmasına zəmanət vermir. Yağış, duman və ya sıx buludlar olduqda “Shahed”lər bulud qatında uça bilir və vizual aşkarlama mümkün olmur. Belə vəziyyətdə hədəfin müdafiə xəttini yarmaq ehtimalı çox yüksəkdir”, - deyə hərbçi bildirib.
Ukrayna Silahlı Qüvvələrinin Baş Komandanı Oleksandr Sırskinin məlumatına görə, Rusiya Ukraynaya qarşı hava hücumlarında reaktiv mühərrikli zərbə PUA-larının istifadəsini əhəmiyyətli dərəcədə artırmağı planlaşdırır və onların payı gələcəkdə 50 faizə çata bilər.
Məlumata görə, 2026-cı ilin əvvəlindən iyunun ortalarınadək Rusiya qüvvələri Geran-3, Geran-4 və Geran-5 tipli 1400 reaktiv mühərrikli PUA istifadə edib. Müqayisə üçün qeyd olunur ki, əvvəlki ilin tamamı ərzində bu tipdən cəmi 180 aparat qeydə alınmışdı.
Sevinc Əliyeva
Ordu.az
