Ordu.az xəbər verir ki, ROKETSAN sistemin son sınaq görüntülərini ictimaiyyətə təqdim edib.
L-OMTAS raketi Türkiyə Silahlı Qüvvələrinin sabit və hərəkətli zirehli təhdidlərə qarşı tank əleyhinə imkanlarını əhəmiyyətli dərəcədə artırmaq məqsədilə hazırlanıb.
Sistem döyüş meydanında müxtəlif zirehli hədəflərə qarşı effektiv vasitə kimi nəzərdə tutulub. Raket 5,5 kilometrədək təsir məsafəsinə malikdir və 32 kiloqram ağırlığındadır.
L-OMTAS yarı aktiv lazer axtarış başlığı ilə təchiz olunub və zirehdələn tandem tank əleyhinə döyüş başlığı daşıyır. Bu döyüş başlığı xüsusilə yeni nəsil reaktiv zirehlərlə qorunan hədəflərə qarşı yüksək effektivlik nümayiş etdirir.
Raket sabit və hərəkətli hədəflərə, tanklara, zirehli maşınlara, döyüş texnikalarına və beton istehkamlara qarşı istifadə oluna bilir. Sistem öz üçayaqlı buraxılış qurğusu üzərindən tətbiq oluna bildiyi kimi, açıq və qapalı qülləli quru platformalarına da inteqrasiya edilə bilir.
L-OMTAS standart OMTAS versiyası ilə müqayisədə daha aşağı xərc tələb edən istehsal üstünlüyünə malikdir. Lazerlə yönləndirmə texnologiyası nöqtə hədəflərinə qarşı yüksək dəqiqlik təmin etsə də, operatorun hədəfi lazerlə davamlı işıqlandırmasını tələb edir.
Bunun nəticəsində daha aşağı xərc hesabına yüksək dəqiqlikli zərbə imkanları əldə edilir. Son dövrdə keçirilən qəbul sınaqları zamanı L-OMTAS raketləri müəyyən edilmiş bütün hədəfləri dəqiq vuraraq məhv edib. Sınaqlar həm sabit, həm də hərəkətli zirehli hədəflərə qarşı həyata keçirilib.
Bu nəticələr sistemin etibarlılığını bir daha təsdiqləyib və onun seriyalı istehsala keçid prosesini sürətləndirib.
L-OMTAS ilk dəfə 2024-cü ildə keçirilən SAHA EXPO sərgisində nümayiş etdirilmişdi. Həmin vaxtdan etibarən sistem üzərində intensiv inkişaf və sınaq işləri aparılıb.
Mütəxəssislərin fikrincə, L-OMTAS Türkiyə Silahlı Qüvvələrinin mövcud tank əleyhinə sistemlərini, o cümlədən “Kornet-E” və OMTAS komplekslərini tamamlayan mühüm vasitəyə çevriləcək. Raketin 5,5 kilometrlik təsir məsafəsi bölmələrə daha uzaq məsafələrdən hədəfləri məhv etmək imkanı verir və şəxsi heyətin sağqalma imkanlarını artırır.
Üçayaqlı buraxılış qurğusundan istifadə oluna bilməsi onu yüngül piyada bölmələri və xüsusi təyinatlı qruplar üçün uyğun edir. Eyni zamanda zirehli döyüş maşınlarına inteqrasiya olunaraq müxtəlif platformalarda tətbiq edilə bilər. Tandem döyüş başlığı müasir reaktiv zirehlə qorunan əsas döyüş tanklarına qarşı effektiv həll təqdim edir. Lazerlə yönləndirmə isə operatora zərbə nöqtəsini dəqiqləşdirmək və lazım gəldikdə hədəfi yeniləmək imkanı yaradır.
L-OMTASın silahlanmaya qəbulu ilə Türkiyə OMTAS, L-OMTAS və UMTAS/L-UMTAS sistemlərini əhatə edən yerli tank əleyhinə raket ailəsini daha da gücləndirmiş olur.
Mütəxəssislər hesab edirlər ki, sistemin silahlanmaya qəbul olunması müdafiə sənayesinin ixrac potensialını da artıracaq və dost, eləcə də müttəfiq ölkələr üçün aşağı xərc tələb edən alternativ yaradacaq.
Sevinc Əliyeva
Ordu.az
