Ordu.az xəbər verir ki, iyunun 18-də elan olunan müqaviləyə əsasən işlərin 2028-ci il yanvarın 31-dək davam etdirilməsi planlaşdırılır.
Müqavilə ABŞ ordusunun hazırda ən qabaqcıl “Abrams” konfiqurasiyası hesab olunan M1A2 SEPv3 tanklarının istehsal proqramına əlavə maliyyə dəstəyi təmin edəcək.
SEPv3 (System Enhancement Package Version 3) ABŞ ordusunun aktiv xidmətdə olan ən müasir “Abrams” tankı hesab edilir. Platforma əvvəlki variantlarda istifadə olunan 120 mm çaplı M256 yivsiz topu qoruyub saxlasa da, elektron sistemlər, mühafizə vasitələri və tapşırıq sistemləri sahəsində geniş təkmilləşdirmələrə malikdir.
Tankda quraşdırılmış zirehaltı köməkçi enerji qurğusu əsas mühərrik işə salınmadan elektron sistemlərin istifadəsinə imkan verir. Bu isə yanacaq sərfiyyatını və istilik izini azaldır.
Platformada yerləşdirilmiş Nəqliyyat Vasitəsinin Sağlamlığının İdarəedilməsi Sistemi texniki xidmət və nasazlıqların real vaxt rejimində izlənilməsini təmin edir.
M1A2 SEPv3 yenilənmiş rabitə və şəbəkə arxitekturası sayəsində digər quru platformaları və komanda-idarəetmə sistemləri ilə hədəf məlumatlarını paylaşa bilir.
Təkmilləşdirilmiş atəş idarəetmə sistemi tankın hədəflərə daha sürətli və daha dəqiq nişanalma aparmasına imkan yaradır. Proqramlaşdırılan sursatlarla uyğun məlumat bağlantısı sayəsində sursatların əvvəlcədən müəyyən olunmuş məsafədə partladılması mümkündür.
Tank həmçinin təkmilləşdirilmiş əldəqayırma partlayıcı qurğulara qarşı mühafizə, uzun və orta dalğalı termal görüntüləmə sistemləri, eləcə də uzaqdan idarə olunan silah stansiyası ilə təchiz olunub.
Dörd nəfərlik ekipaj tərəfindən idarə edilən “Abrams” tankının uzunluğu təxminən 9,7 metr, eni 3,7 metr, hündürlüyü isə 2,4 metr təşkil edir. “General Dynamics Land Systems” şirkəti tankları Ohayo ştatında yerləşən Lima Birgə Sistemlər İstehsal Mərkəzində istehsal edir.
ABŞ ordusu 2020-ci ildə M1A2 SEPv3 tanklarının istehsalı üçün şirkətlə 4,6 milyard dollarlıq böyük müqavilə imzalamışdı. Proqram yalnız ABŞ ordusunun ehtiyaclarını deyil, ixrac müştərilərinin tələblərini də qarşılayır. Bu çərçivədə Polşa 250 ədəd M1A2 SEPv3 “Abrams” tankı sifariş edib və təhvil prosesi 2025-ci ildə başlayıb.
ABŞ ordusu bir tərəfdən M1A2 SEPv3 istehsalını davam etdirərkən, digər tərəfdən gələcəyin “Abrams” variantı hesab edilən M1E3 tankı üzərində də iş aparır.
Bununla belə, SEPv3 versiyası hazırda aktiv hissələrdə, ehtiyat qüvvələrdə və Milli Qvardiya bölmələrində standart “Abrams” konfiqurasiyası olaraq xidmətini davam etdirir.
Sevinc Əliyeva
Ordu.az
