Ordu.az xəbər verir ki, THUNDART sistemi köhnəlmiş reaktiv artilleriya sistemlərini əvəz etmək məqsədilə hazırlanıb.
Məlumata görə, THUNDART 150 kilometrədək məsafədə yerləşən hədəfləri yüksək dəqiqliklə məhv etmək qabiliyyətinə malik idarəolunan sistem kimi nəzərdə tutulur.
Sistemin hazırlanmasında radioelektron mübarizə şəraitində fəaliyyət qabiliyyətinin qorunmasına xüsusi diqqət yetirilib. THUNDART-ın radioelektron maneələrə qarşı dayanıqlı olması və GNSS peyk naviqasiya siqnallarından asılılığının minimuma endirilməsi hədəflənir.
Layihə tamamilə Fransanın milli imkanlarına əsaslanan strateji sistem kimi hazırlanır.
Sistemdə raket mühərrikləri sahəsində ixtisaslaşmış “Roxel” şirkəti də daxil olmaqla bir sıra sənaye tərəfdaşlarının hazırladığı mühərrik, tuşlama, naviqasiya və son mərhələ dəqiqlik texnologiyaları birləşdirilib.
“MBDA France” şirkətinin baş direktoru Stefan Reb bildirib ki, tərəflərin bir-birini tamamlayan sənaye təcrübəsi Fransa Silahlı Qüvvələrinə uzun illər xidmət göstərəcək və gələcək münaqişələrə uyğunlaşa biləcək strateji imkan təqdim edir.
Şirkətlər həmçinin sistemin inkişafını və gələcək modernizasiya işlərini idarə etmək məqsədilə birgə müəssisə yaratmağı planlaşdırırlar. THUNDART proqramı Fransanın uzaqmənzilli artilleriya qüvvələrinin genişmiqyaslı modernizasiya proqramının tərkib hissəsi hesab olunur.
Bu ilin may ayında “Thales” və “ArianeGroup” şirkətləri köhnəlmiş çoxsaylı raket buraxılış sistemlərini əvəz etmək üçün hazırlanan FLP-T 150 ballistik sursatının ilk sınaq atışını uğurla həyata keçirmişdilər.
FLP-T 150 ballistik raket sistemlərindən götürülmüş mühərrik, tuşlama və idarəetmə texnologiyalarından istifadə edir və 150 kilometrədək məsafədə yerləşən hədəfləri məhv etmək qabiliyyətinə malikdir.
Bununla yanaşı, “Turgis Gaillard” şirkəti də 2025-ci ilin mayında Fransa Quru Qoşunlarına alternativ həll kimi “Foudre” sistemini təqdim edib. Sistem altı ədəd 227 mm çaplı M31 raketi daşıya bilən modul tipli buraxılış qurğusu ilə təchiz olunub.
Sevinc Əliyeva
Ordu.az
