Ordu.az xəbər verir ki, müqavilə çərçivəsində ABŞ-yə məxsus 6, Avstraliyaya məxsus isə 3 olmaqla ümumilikdə 9 təyyarə “Increment 3 Block 2” standartına yüksəldiləcək.
Modernləşdirmə paketi yeni sensorlar, antenlər, radar qübbələri, elektron sistemlər və missiya avadanlıqlarını dəstəkləyən kabel infrastrukturunun yenilənməsini əhatə edir.
“Increment 3 Block 2” modernləşdirməsindən sonra P-8A təyyarələri daha inkişaf etmiş missiya kompüterləri, genişzolaqlı peyk rabitə sistemləri, yeni akustik analiz imkanları, siqnal kəşfiyyatı sistemləri və təkmilləşdirilmiş hədəf izləmə funksiyaları əldə edəcək.
ABŞ Hərbi Dəniz Aviasiya Sistemləri Komandanlığının məlumatına görə, yenilənmə təyyarələrin müasir sualtı qayıqları aşkarlamaq, izləmək və onlara qarşı fəaliyyət göstərmək imkanlarını əhəmiyyətli dərəcədə artıracaq.
“Boeing” tərəfindən hazırlanmış P-8A “Poseidon” ABŞ Hərbi Dəniz Qüvvələrinin əsas dəniz patrul və sualtı qayıqlara qarşı mübarizə platforması hesab olunur. “Boeing 737-800” sərnişin təyyarəsi əsasında yaradılmış platforma AGM-84 “Harpoon” gəmi əleyhinə raketləri, torpedolar və sonoboy sistemləri daşıya bilir.
Təxminən 7500 kilometr uçuş məsafəsinə və 10 saata qədər havada qalma imkanına malik olan təyyarə geniş dəniz ərazilərində kəşfiyyat, müşahidə və sualtı qayıqların axtarışı missiyalarını yerinə yetirir. Avstraliya “Increment 3 Block 2” modernləşdirmə proqramına qoşulan ilk və hazırda yeganə beynəlxalq P-8A istifadəçisi hesab olunur.
14 ədəd P-8A “Poseidon” istismar edən Avstraliyanın ilk təyyarələri 2025-ci ildə modernləşdirmə prosesinə cəlb edilmişdi. Yeni müqavilə çərçivəsində daha üç Avstraliya təyyarəsi yenilənmiş standarta uyğunlaşdırılacaq.
ABŞ Hərbi Dəniz Qüvvələri “Increment 3 Block 2” konfiqurasiyasını 2026-cı il aprelin 24-də ilkin əməliyyat hazırlığı səviyyəsinə çatdırıb. “Boeing” tərəfindən həyata keçiriləcək modernləşdirmə işlərinin əsas hissəsi Florida ştatının Ceksonvill şəhərində yerləşən müəssisələrdə aparılacaq.
Proqramın 2029-cu ilin may ayına qədər davam etməsi planlaşdırılır. ABŞ Hərbi Dəniz Qüvvələri uzunmüddətli perspektivdə istismarda olan təxminən 130 ədəd P-8A “Poseidon” təyyarəsinin hamısını yeni standarta yüksəltməyi hədəfləyir.
Sevinc Əliyeva
Ordu.az
