Ordu.az xəbər verir ki, bu barədə “The Baltic Sentinel” nəşri məlumat yayıb.

Məlumata görə, qərarın səbəbləri arasında hüquqi məsələlər, büdcə prioritetləri və Estoniyanın öz antidron texnologiyaları sektorunu inkişaf etdirmək istəyi göstərilir.

Eyni zamanda Latviya sazişi imzalayıb. Latviya Müdafiə Nazirliyinin açıqlamasına görə, sənədin 10 il müddətində qüvvədə qalması planlaşdırılır.

Latviya ilk iki il ərzində layihəyə təxminən 110 milyon avro xərcləməyi nəzərdə tutur. Bununla belə, bütün maliyyə qərarlarının hökumət və parlament tərəfindən ayrıca təsdiqlənməsi tələb olunacaq.

Bildirilir ki, vəsaitin bir hissəsi Ukrayna istehsalı antidron sistemlərinin, müşahidə vasitələrinin və əlaqəli komanda-idarəetmə sistemlərinin alınmasına yönəldilə bilər.

Məlumata görə, “PUA sazişi” adlandırılan sənəd əslində daha geniş müdafiə əməkdaşlığı proqramıdır və pilotsuz sistemlər yalnız qısamüddətli prioritetlərdən biri kimi müəyyən edilib.

Daha əvvəl Estoniya və digər Baltik ölkələri Ukraynanın antidron texnologiyalarına maraq göstəriblər. Latviya Müdafiə Nazirliyinin izahına əsasən, Ukrayna artıq hərbi məhsulların ixracına icazə verib.

Rəsmi açıqlamalara görə, Estoniya Tallində sənədi imzalamağa hazır olmayıb, çünki ilkin məlumatlar kifayət qədər işlənməmiş hesab olunub.

Bundan əlavə, saziş uzunmüddətli maliyyə öhdəliklərini ehtiva etdiyindən onun Estoniya parlamenti tərəfindən ratifikasiya olunması tələb oluna bilər.

Nəşr qeyd edir ki, Tallinin öz müdafiə sənayesini dəstəkləmək istəyi də qərara təsir göstərən amillərdən biridir.

Hazırda Estoniyada antidron texnologiyaları sahəsində formalaşan ekosistem fəaliyyət göstərir. Bir sıra yerli şirkətlər məhsullarını Ukraynaya göndərib, onları real döyüş şəraitində sınaqdan keçirib və ya hərbi yardım kimi təqdim edib.

Məsələn, “Threod Systems” PUA və onların buraxılış sistemlərini təqdim edib. “KrattWorks” isə Ukrayna hərbçilərinin təcrübəsi əsasında texnologiyalarını təkmilləşdirib.

“Skyfortress” şirkəti ağır silahlarla təchiz olunan pikap avtomobilləri üzərində mobil antidron sistemləri hazırlayır.

Bundan başqa, “DefSecIntel” uzaqmənzilli PUA-lara qarşı inteqrasiya edilmiş mobil həllər üzərində işləyir, “Frankenburg Technologies” isə Ukraynada aşağı xərcə malik önləyici raketin sınaqlarını keçirməyə hazırlaşır.

Qeyd olunur ki, Ukrayna və Estoniya şirkətləri arasında zərbə PUA-ları, önləyici PUA-lar və radioelektron mübarizə sistemlərinin istehsalı sahəsində əməkdaşlıq artıq davam edir.

Bu səbəbdən Estoniyanın ehtiyatlı mövqeyi yalnız hüquqi məsələlərlə deyil, həm də müdafiə resurslarının bölüşdürülməsinə strateji yanaşma ilə izah olunur.

Sevinc Əliyeva
Ordu.az