Ordu.az xəbər verir ki, bu barədə şirkətin baş direktoru Adrien Kanter Parisdə keçirilən “VivaTech” texnologiya forumunda danışıb.
Onun sözlərinə görə, şirkət önləyici PUA-ları Yaxın Şərqdə istifadəyə təqdim etməyə başlayanda sistemlər gözlənilən səviyyədə işləməyib.
Əsas problemlərdən biri qumun mühərriklərə daxil olması olub. Digər problem isə yüksək temperaturla PUA-ların qara rəngli korpusunun birləşməsi nəticəsində bort elektronikasının həddindən artıq qızması ilə bağlı olub.
“Mühəndis heyətimizdə Ukraynada fəaliyyət göstərən böyük bir ukraynalı mühəndis qrupu var və onlar daha rahat həyat tərzinə malik olan, eyni təcili yanaşmanı hiss etməyən fransız mühəndislərimizi daim irəli aparırlar”, - deyə Kanter bildirib.
Şirkətin Ukrayna komandasında toplanmış təcrübə sayəsində material seçimi və PUA-nın konstruksiyası cəmi 10 gün ərzində dəyişdirilib. Bu dəyişikliklər soyutma səmərəliliyinin əhəmiyyətli dərəcədə artırılmasına imkan verib.
“Bu, bizim “Ukrayna sürəti” adlandırdığımız yanaşmaya çox bənzəyir. Mən hətta ukraynalı mühəndislərimdən bunu izah etmələrini xahiş etmişdim. Düşünürəm ki, oradakı hərbi müştəri iki həftədən az müddətdə Ukraynada işləyən sistemi Yaxın Şərqdə işləməyən vəziyyətdən tam funksional vəziyyətə gətirməyimizə heyran qalmışdı”, - deyə o vurğulayıb.
Adrien Kanter hesab edir ki, hərbi satınalma sistemi uzun illər ərzində ideal məhsul yaratmaq yanaşmasından imtina etməli və qısa müddətdə kifayət qədər effektiv sistemlərin hazırlanmasına üstünlük verməlidir.
“Düşünürəm ki, biz “kifayət qədər yaxşı” məhsullar yaratmalıyıq. Adətən müdafiə sənayesində sizdən illərlə hazırlanacaq ideal məhsul tələb olunur. Mənim fikrimcə, bir neçə həftəyə 80 faiz hazır məhsula sahib olmaq, illər sonra 99 faiz hazır məhsula sahib olmaqdan daha yaxşıdır. Sürət əsas amildir və sürətlə etibarlılıq arasında balans tapmaq lazımdır. Şəxsi heyətin təhlükəsizliyi hər zaman birinci yerdədir və biz bundan heç vaxt imtina etmərik. Amma mühəndislərimə həmişə deyirəm ki, həqiqət döyüş meydanında üzə çıxır”, - deyə o əlavə edib.
Bundan əvvəl “Militarnyi” nəşri “Alta Ares” şirkətinin Ukraynanın LATEK şirkəti ilə birlikdə yeni önləyici PUA-ların istehsalını Ukraynada təşkil etməyi planlaşdırdığını yazmışdı.
Bu barədə LATEK şirkətinin sahibi Oleksandr Popov məlumat verib. Onun sözlərinə görə, şirkət artıq “Alta Ares” ilə əməkdaşlıq edir və PUA istehsalı üçün lazım olan avadanlıqların təmin olunmasına dəstək göstərir.
“Əməkdaşlıq müqaviləmiz var və gələcəkdə onu genişləndirərək məhsullarının Ukraynada istehsalını təşkil etməyi planlaşdırırıq. Hələlik onların modelləri inkişaf mərhələsində olduğu üçün istehsala başlamamışıq”, - deyə Popov bildirib.
Məlumata görə, “Alta Ares” ukraynalı mühəndislərlə birlikdə iki önləyici PUA üzərində işləyir. Bunlar çoxrotorlu X-LOCK və reaktiv mühərrikli BLACK BIRD modelləridir.
Sevinc Əliyeva
Ordu.az
