Ordu.az xəbər verir ki, bu barədə şirkət “X” sosial şəbəkəsindəki səhifəsində məlumat yayıb.
“Polad Günbəz” ABŞ-nin “Golden Dome” təşəbbüsünə və İsrailin təbəqəli hava hücumundan müdafiə sistemlərinə bənzər çoxsəviyyəli müdafiə layihəsidir. Müqavilə üzrə komponentlərin təhvilinin 2028-2032-ci illərdə həyata keçirilməsi nəzərdə tutulur.
Layihəyə əsasən, sistemə pilotsuz uçuş aparatı əleyhinə texnologiyalar və yaxın mənzilli təhdidlərə qarşı hava hücumundan müdafiə sistemləri daxil ediləcək. Bunlar arasında “Korkut” C-RAM zenit artilleriya sistemi, “Ejderha” mikrodalğa sistemi və “Gokberk” lazer kompleksi yer alır.
Sistemə daha uzaq mənzilli vasitələr də inteqrasiya ediləcək. Bunlara “Gurz 140” top-raket hava hücumundan müdafiə sistemi, Hisar qısa və orta mənzilli kompleksləri, həmçinin Siper uzaqmənzilli hava hücumundan müdafiə sistemi daxildir.
Layihə müxtəlif mənbələrdən məlumatları birləşdirərək vahid hava mənzərəsi yaradan və pilotsuz uçuş aparatlarından, qanadlı raketlərdən tutmuş təyyarələrə və ballistik hədəflərə qədər müxtəlif təhdidlərə qarşı ən uyğun vasitəni seçməyə imkan verən sistemlər sistemi kimi hazırlanır.
Layihənin əsas podratçısı olan ASELSAN 2025-ci ilin sentyabrında Türkiyə Müdafiə Sənayesi Komitəsi ilə 1,9 milyard dollar dəyərində müqavilə imzalamışdı. Şirkət həmçinin Avropanın ən böyük hava hücumundan müdafiə istehsal müəssisəsinə çevrilməsi gözlənilən istehsal mərkəzi üçün dövlət tərəfindən 1,5 milyard dollarlıq investisiya alıb.
“Polad Günbəz” layihəsinin təcrübəsinə əsaslanaraq NATO 2025-ci ildə ASELSAN ilə birlikdə modul tipli yerüstü hava hücumundan müdafiə sisteminin hazırlanmasına başlayıb.
Müqavilə layihənin ilk konsepsiya mərhələsində iştirakı nəzərdə tutur. Bu mərhələdə sistemin arxitekturasının hazırlanması həyata keçirilir. Layihəyə “Airbus Defence and Space”, “Lockheed Martin UK”, “Raytheon” və “Thales LAS” da qoşulub.
2026-cı ilin aprelində Türkiyənin İtaliya ilə Avropa istehsalı olan SAMP/T hava hücumundan müdafiə sistemlərinin alınması və birgə istehsalı barədə danışıqlar apardığı bildirilmişdi.
Müdafiənin gücləndirilməsi ehtiyacı Yaxın Şərqdə münaqişənin başlanmasından sonra NATO qüvvələrinin Türkiyə istiqamətində atılmış dörd İran raketini zərərsizləşdirməsindən sonra daha da aktuallaşıb.
Türkiyə və Eurosam 2018-ci ildə birgə inkişaf üzrə ilkin razılaşma imzalasalar da, Fransanın etirazları sonrakı prosesi ləngitmişdi. Ankara hesab edir ki, dəyişən regional təhlükəsizlik mühiti alyansın cənub-şərq cinahını gücləndirmək məqsədilə tərəfdaşları texnologiya ixracı ilə bağlı mövqelərini yenidən nəzərdən keçirməyə sövq edə bilər.
Sevinc Əliyeva
Ordu.az
