Ordu.az xəbər verir ki, bu barədə Ermənistanın “Past” nəşri “Seçkilərdən sonra açıq qalan suallar: Təzyiqlər, xarici təsirlər və etimad böhranı” başlıqlı məqaləsində yazıb.

Məqalədə qeyd olunur ki, müxalif siyasi qüvvələr seçki prosesinin bütün mərhələlərində görünməmiş təzyiqlərlə üzləşdiklərini dəfələrlə bəyan ediblər. Onların fikrincə, seçkiqabağı dövr siyasi təqiblər, hüquq-mühafizə orqanlarının fəal iştirakı, inzibati resurslardan istifadə və müxalif fəaliyyətin məhdudlaşdırılması cəhdləri ilə müşayiət olunub.

“Müxalifət nümayəndələri hesab edirlər ki, bu addımlar siyasi rəqabətə təsir göstərmək və hakimiyyət üçün daha əlverişli şərait formalaşdırmaq məqsədi daşıyıb. Onların sözlərinə görə, seçki prosesində bərabər imkanlar prinsipi tam şəkildə təmin edilməyib və bu da nəticələrin legitimliyi ilə bağlı əlavə suallar doğurub.

Seçkilərlə bağlı müzakirələrin mühüm istiqamətlərindən biri də xarici təsirlər mövzusu olub. Bir sıra siyasətçilər və ekspertlər Ermənistanın daxili siyasi proseslərinə müxtəlif xarici mərkəzlərin misli görünməmiş maraq göstərdiyinə diqqət çəkiblər.

Onların fikrincə, seçkilərdən əvvəl və seçkilər zamanı müxtəlif beynəlxalq qurumlar və xarici rəsmilər tərəfindən verilən açıqlamalar Ermənistanın daxili siyasi proseslərinin beynəlxalq aktorların xüsusi diqqət mərkəzinə çevrildiyini nümayiş etdirib. Məqalə müəllifləri hesab edirlər ki, bu vəziyyət ölkədə gedən siyasi proseslərin yalnız daxili məsələ kimi qiymətləndirilməsinin çətin olduğunu göstərir”, - deyə nəşr bildirib.

Bu kontekstdə Rusiya Xarici İşlər Nazirliyinin rəsmi nümayəndəsi Mariya Zaxarovanın açıqlamasına da xüsusi yer ayrılır. Məqalədə xatırladılır ki, Zaxarovanın sözlərinə görə, Ermənistanda parlament seçkiləri hakimiyyətin müxalifətə qarşı görünməmiş təzyiqləri və Qərbin görünməmiş müdaxiləsi şəraitində keçirilib.

Məqalə müəllifləri qeyd edirlər ki, siyasi baxışlardan və qiymətləndirmələrdən asılı olmayaraq, seçkilərdən sonra cəmiyyətdə çoxsaylı suallar qalmaqda davam edir. Onların fikrincə, siyasi mübarizə səsvermə gününün başa çatması ilə yekunlaşmayıb, əksinə, hazırda seçkilərin nəticələrinin və həmin nəticələrə aparan proseslərin qiymətləndirildiyi yeni mərhələ başlayıb.

“Demokratik sistemlərdə seçkilərin nəticələrinə inam qədər seçki prosesinin özünə olan etimad da mühüm əhəmiyyət daşıyır. Əgər siyasi prosesin iştirakçılarının əhəmiyyətli hissəsi təzyiqlərdən, qeyri-bərabər şərtlərdən və ya xarici müdaxilələrdən danışırsa, bu vəziyyət qaçılmaz olaraq cəmiyyətdə şübhə və inamsızlıq yaradır.

Belə şəraitdə dövlətin qarşısında duran əsas vəzifə yalnız siyasi sabitliyi qorumaq deyil, həm də seçki institutlarına və demokratik mexanizmlərə ictimai etimadı bərpa etməkdir. İctimai etimadın itirilməsi uzunmüddətli perspektivdə siyasi sistem üçün ciddi problemlər yarada bilər.

Ermənistanın siyasi həyatı yenidən mühüm bir mərhələyə daxil olub. Seçkilərin nəticələri hüquqi prosedurlar vasitəsilə rəsmiləşdirilə bilər, lakin onların siyasi və ictimai qiymətləndirilməsi uzun müddət müzakirə mövzusu olaraq qalacaq”, - deyə məqalədə qeyd edilib.

Məqalə müəlliflərinin qənaətinə görə, yaranmış etimadsızlıq mühitinin aradan qaldırılıb-qaldırılmayacağı, siyasi sistemə inamın bərpa olunub-olunmayacağı qarşıdakı dövrdə hakimiyyətin və siyasi qüvvələrin atacağı addımlardan birbaşa asılı olacaq. Bu baxımdan, postseçki dövrünün Ermənistanın gələcək siyasi inkişaf trayektoriyasının müəyyənləşdirilməsində həlledici rol oynayacağı bildirilir.

Alpər Mövludoğlu
Ordu.az