Ordu.az xəbər verir ki, bu barədə şirkətin yaydığı məlumatda bildirilib.
Məlumata görə, Qlosterşir bölgəsində yerləşən “Pershore” poliqonunda keçirilən sınaqlarda sistem müxtəlif ssenarilər çərçivəsində ümumilikdə 80 PUA-nı sıradan çıxarmağa nail olub.
“RapidDestroyer” ənənəvi hava hücumundan müdafiə sistemlərindən fərqli olaraq raket, top və ya lazerdən istifadə etmir. Sistem yüksək tezlikli radioenerjini hədəfə yönəldərək PUA-nın daxili elektron komponentlərini zədələyir və ya onları fəaliyyətsiz vəziyyətə gətirir.
Bu üsul sayəsində uçuş idarəetmə kompüteri, naviqasiya sistemləri, məlumat bağlantıları və enerji idarəetmə komponentləri sıradan çıxır, nəticədə hədəf öz missiyasını davam etdirə bilmir. Buna görə də sistem klassik radioelektron mübarizə vasitəsindən daha çox “elektron məhvetmə” qabiliyyətinə malik həll kimi qiymətləndirilir.
Sınaqlarda istifadə olunan yeni nəsil dörd panelli radiotezlik yayıcı arxitekturası hədəfə ötürülən enerji miqdarını artırmaqla yanaşı, sistemin effektiv fəaliyyət məsafəsini də genişləndirib.
Şirkət yeni konfiqurasiyanın kiçik PUA-lara qarşı daha yüksək uğur göstəricisi təmin etdiyini açıqlasa da, tezlik diapazonu, güc səviyyəsi və istifadə olunan dalğa formaları barədə ətraflı məlumat verməyib.
Bildirilib ki, zərərsizləşdirilən 80 PUA bir hücum zamanı deyil, müxtəlif sınaq ssenariləri çərçivəsində məhv edilib.
Bir müddət əvvəl Böyük Britaniya Müdafiə Nazirliyinin RFDEW (Radio Frequency Directed Energy Weapon) proqramı çərçivəsində aparılan sınaqlarda sistemin 1 kilometrədək məsafədəki hədəflərə nişanalma həyata keçirə bildiyi və hər atışın enerji xərcinin 10 pensdən aşağı olduğu açıqlanmışdı.
2025-ci ilin aprel ayında dərc edilən məlumatlara görə, Böyük Britaniyanın radiotezlik yönləndirilmiş enerji proqramları çərçivəsində 100-dən çox PUA izlənilərək zərərsizləşdirilib. Bunlar arasında eyni vaxtda həyata keçirilən sürü PUA hücumlarına qarşı nişanalmalar da olub.
“RapidDestroyer” sisteminin əsasən hərbi bazaların, sursat anbarlarının, radar obyektlərinin, limanların, hava bazalarının və digər kritik hərbi infrastrukturun mühafizəsində istifadə olunacağı nəzərdə tutulur. Sistem hava hücumundan müdafiə arxitekturasında raket, top və radioelektron mübarizə vasitələri ilə yanaşı, aşağı xərc tələb edən yaxınmənzilli müdafiə təbəqəsi formalaşdırmağı hədəfləyir.
Böyük Britaniya Ordusu gələcəkdə sistemin MAN “Support Vehicle” tipli hərbi nəqliyyat vasitələrinə inteqrasiya edilərək bir nəfər tərəfindən idarə oluna bilən mobil antidron platformasına çevrilə biləcəyini qiymətləndirir.
Sevinc Əliyeva
Ordu.az
