Ordu.az xəbər verir ki, bu barədə “Reuters” agentliyi məlumat yayıb.

Kanadanın Baş naziri Mark Karni jurnalistlərə bildirib ki, Ottava “Bombardier” şirkətinin “Global 6500” biznes təyyarəsi platforması əsasında hazırlanmış “Saab GlobalEye” aviasiya kompleksini seçib.

Məlumata görə, müqavilənin əsas rəqiblərindən biri “Boeing E-7 Wedgetail” təyyarəsi olub. Lakin bu proqram son dövrlərdə istehsal gecikmələri və büdcə artıqlığı ilə üzləşib.

“Bu addım Kanadanın strateji müstəqilliyini gücləndirir, ölkə daxilində yeni iş yerləri yaradır və bizi qlobal lider kimi daha da gücləndirir. Bundan əlavə, bu məhsulu artıq Kanadanın bir çox əsas tərəfdaşları, o cümlədən Fransa, İsveç və Birləşmiş Ərəb Əmirlikləri seçib”, - deyə Mark Karni bildirib.

Qeyd olunub ki, “Saab” şirkəti həmçinin JAS 39 “Gripen” çoxməqsədli qırıcılarının tədarükü ilə bağlı digər böyük Kanada müqaviləsi uğrunda da mübarizə aparır.

Kanada daha əvvəl “Lockheed Martin” istehsalı olan 88 ədəd beşinci nəsil F-35 “Lightning II” qırıcısının alınması ilə bağlı müqavilə imzalamışdı.

Lakin ötən il ABŞ Kanada idxalına qarşı sərt ticarət rüsumları tətbiq etdikdən sonra Baş nazir Karni müdafiə qurumuna sifarişin azaldılması və təyyarələrin bir hissəsinin alternativ xarici istehsalçıdan alınması imkanlarını araşdırmağı tapşırıb.

Kanada hökuməti bu məsələ ilə bağlı yekun qərarını hələ açıqlamayıb.

Sevinc Əliyeva
Ordu.az