Ordu.az xəbər verir ki, tərəflər layihənin əsas xüsusiyyətlərini müəyyən edən sənədi imzalayaraq strateji tərəfdaşlıqlarını gücləndiriblər.
Mayın 19-da imzalanan memorandum “CaMo” strateji tərəfdaşlığı çərçivəsində iki ölkə arasında sənaye və əməliyyat əməkdaşlığını konkretləşdirən mühüm addım kimi qiymətləndirilir.
Quru Qoşunlarının komandanı general-mayor Bonye və general Patrik Jüstel tərəfindən imzalanan sənəd VBAE platformasının yüksək intensivlikli döyüş meydanı tələblərinə uyğun formalaşdırıldığını göstərir.
Fransa və Belçika mütəxəssislərinin yaxın əməkdaşlığı ilə hazırlanan vasitənin JAGUAR sistemlərini dəstəkləməsi nəzərdə tutulur.
VBAE təhdidlərin aşkarlanması və zərərsizləşdirilməsi proseslərində aktiv rol oynayacaq və bununla da JAGUAR vasitələrinin əməliyyat imkanlarını birbaşa artıracaq.
OCCAR məlumatlarına görə, maksimal ümumi çəkisinin 8 ton olması planlaşdırılan VBAE mina, əldəqayırma partlayıcı qurğular və mərmilərə qarşı gücləndirilmiş zireh müdafiəsi ilə təchiz ediləcək.
Üç nəfərlik heyətə malik 4×4 platforma “Airbus” A400M təyyarələri ilə hava yolu vasitəsilə daşına biləcək şəkildə hazırlanır.
Vasitədə istifadə olunacaq silah sistemlərinə orta çapa qədər uzaqdan idarə olunan silah sistemi, əl ilə idarə olunan kiçik çaplı qüllələr, raket və idarəolunan raket variantları daxil olacaq.
Layihənin texniki konsepsiyası VBAE-nin yalnız zirehli vasitə deyil, həm də geniş imkanlara malik kəşfiyyat platforması olduğunu göstərir. Vasitə dərin kəşfiyyat missiyalarını yerinə yetirmək və genişləndirilmiş taktiki dərinlikdə xüsusi kəşfiyyat məlumatları toplamaq üçün optimallaşdırılır.
Bundan əlavə, platforma döyüş meydanında komanda-idarəetmə vasitəsi kimi fəaliyyət göstərə biləcək avadanlıqlarla hazırlanır. VBAE layihəsinin dizayn mərhələsi 2023-cü il dekabrın ayında “Arquus”, KNDS və “John Cockerill Defense” konsorsiumuna həvalə olunub.
Layihə hər iki ölkənin müasir, qarşılıqlı uyğun və suveren müdafiə qabiliyyətlərinin inkişafı istiqamətində ortaq hədəflərini əks etdirir. Belçika və Fransa arasındakı sənaye əməkdaşlığı Avropa müdafiə sənayesi ekosistemində birgə inkişaf imkanlarının konkret göstəricisi hesab olunur.
Sevinc Əliyeva
Ordu.az
