Ordu.az xəbər verir ki, keçirilən sınaqlar Fransanın ABŞ istehsalı olan HIMARS sistemlərindən asılılığı azaltmaq və tamamilə milli dərin zərbə imkanları yaratmaq məqsədi baxımından kritik mərhələ hesab olunur.
“Thales” tərəfindən hazırlanan və 6×6 taktiki yük maşını şassisi üzərində yerləşdirilən “X-Fire” buraxılış qurğusu sürətli yerləşdirmə, atəşdən sonra mövqenin tez dəyişdirilməsi və dəqiq uzaqmənzilli zərbə imkanları ilə sınaqdan keçirilib.
“X-Fire” sisteminin Fransa ordusuna 150 kilometrdən artıq mənzilə malik milli dəqiq zərbə qabiliyyəti qazandırması planlaşdırılır.
HIMARS-a bənzər əməliyyat konsepsiyası əsasında hazırlanan “X-Fire”in modulyar buraxılış qurğusu arxitekturası, rəqəmsal atəş idarəetmə infrastrukturu və NATO komanda şəbəkələri ilə uyğun rabitə sistemləri ilə təchiz olunduğu bildirilib.
Gələcək mərhələlərdə sistemin daha uzaqmənzilli konfiqurasiyalara çatdırılmasının hədəfləndiyi qeyd olunub.
Məlumata görə, “Foudre” sistemi klassik artilleriya sistemlərindən fərqli olaraq komanda mərkəzləri, hava hücumundan müdafiə sistemləri, logistika bazaları və cəbhə arxasındakı yüksək əhəmiyyətli hədəflərə qarşı dərin zərbə missiyaları üçün hazırlanır. Proqramın əsas yanaşmasının böyük ölçüdə Ukrayna müharibəsindən çıxarılan nəticələrə əsaslandığı bildirilib.
Uzun mənzilli dəqiq idarəolunan raket sistemlərinin təchizat xətlərini kəsmək, qərargah infrastrukturunu vurmaq və düşmən qüvvələrini cəbhədən uzaq ərazilərə yaymağa məcbur etmək baxımından müasir müharibənin gedişatını dəyişdirdiyi vurğulanıb.
“Foudre” proqramı eyni zamanda Avropanın ABŞ sistemlərindən asılılığı azaltmaq və kritik hərbi texnologiyalar sahəsində yenidən müstəqillik qazanmaq cəhdinin bir hissəsi hesab olunur.
Qeyd olunub ki, ABŞ istehsalı olan M142 HIMARS sistemləri Ukrayna, İraq və Suriyada əməliyyat uğurları əldə etsə də, Fransa sursat təchizatı, proqram yeniləmələri və ixrac qərarlarında Vaşinqtondan asılı olmayan yerli alternativ yaratmağa çalışır.
HIMARS və “X-Fire” arasında əməliyyat baxımından müxtəlif oxşarlıqların olduğu bildirilib.
ABŞ istehsalı olan HIMARS sistemi 6 ədəd GMLRS raketi və ya 1 ədəd ATACMS taktiki ballistik raketi daşıya bilir. Sistem GMLRS sursatları ilə 70 kilometrdən artıq, ATACMS ilə isə təxminən 300 kilometr mənzildə dəqiq zərbə endirə bilir. Gələcəkdə “PrSM” inteqrasiyası ilə bu mənzilin 500 kilometrdən yuxarı çatdırılması planlaşdırılır.
Fransanın “X-Fire” sisteminin isə başlanğıcdan etibarən Avropa istehsalı olan sursatların inteqrasiyasına uyğun modulyar infrastruktur əsasında hazırlandığı qeyd olunub. “Thales” hələlik “Foudre” sursatlarının tam texniki xüsusiyyətlərini açıqlamasa da, sistemin gələcəkdə Avropa istehsalı olan dəqiq idarəolunan raketlər və qanadlı raket sinfinə aid sursatlarla inteqrasiya edilə biləcək şəkildə layihələndirildiyi bildirilib.
Mütəxəssislər vurğulayıblar ki, HIMARS hazırda döyüş təcrübəsi və hərəkət qabiliyyəti baxımından etalon sistem hesab olunur. Xüsusilə Ukrayna ordusunun HIMARS vasitəsilə Rusiya sursat anbarları, körpülər və qərargahlara qarşı həyata keçirdiyi dəqiq zərbələrin döyüş meydanında mühüm əməliyyat nəticələri yaratdığı qeyd olunub.
Fransanın isə “Foudre” proqramı vasitəsilə oxşar dərin zərbə qabiliyyətini Avropa müdafiə sənayesi müstəqilliyi yanaşması ilə inkişaf etdirməyi hədəflədiyi bildirilib.
HIMARS sistemləri ABŞ Xarici Hərbi Satış prosedurları çərçivəsində ciddi nəzarət altında saxlanılır. Fransanın nəzarətində olacaq alternativ sistem Avropa və Yaxın Şərq ölkələri üçün mühüm seçimə çevrilə bilər.
Bu çərçivədə “Foudre” sistemi gələcəkdə yalnız HIMARS-a deyil, həmçinin Cənubi Koreya istehsalı “Chunmoo” və İsrail istehsalı PULS sistemlərinə də rəqib ola bilər.
Sevinc Əliyeva
Ordu.az
