Ordu.az xəbər verir ki, bu barədə Ermənistanın “Past” nəşri “Qərb Paşinyanın yenidən hakimiyyətə gəlməsini təmin etmək üçün hər şeyi edəcək” başlıqlı məqaləsində yazıb.
“GALLUP International Association” tərəfindən Ermənistanda keçirilmiş sorğunun nəticələrinə görə, respondentlərin 59,9%-i hesab edir ki, Ermənistan təsir mərkəzləri ilə balanslaşdırılmış münasibətlər qurmalıdır. Sorğuda iştirak edənlərin 17,6%-i ölkənin Rusiya istiqamətində inteqrasiyasını dəstəkləyib, 12,4%-i Avropa İttifaqını, 5,1%-i isə ABŞ-ni üstün tutub”, - deyə nəşr qeyd edib.
Müəllifin sözlərinə görə, bu nəticələr göstərir ki, hakimiyyətin anti-Rusiya siyasətinə və ölkəni Avropa İttifaqına yönəltmək cəhdlərinə baxmayaraq, cəmiyyət bu kursa böyük maraq göstərmir və onun mümkün nəticələrini anlayır.
“Bu fonda ABŞ və Avropa İttifaqının son günlərdə artan fəallığı diqqət çəkir. 2026-cı il mayın 4-5-də İrəvanda Ermənistan-Avropa İttifaqı ilk sammiti keçiriləcək. Bildirilir ki, tərəflər təhlükəsizlik və müdafiə sahəsində əməkdaşlığı dərinləşdirmək üçün konkret olmayan addımlar atacaqlar, o cümlədən Ermənistanda yeni Avropa İttifaqı tərəfdaş missiyasının yaradılması müzakirə olunur.
Eyni zamanda, ABŞ-də də mühüm qərar qəbul edilib. Nümayəndələr Palatasının ayırmalar komitəsi 2027-ci maliyyə ili üçün milli təhlükəsizlik və Dövlət Departamentinin maliyyələşdirilməsini nəzərdə tutan qanun layihəsini təsdiqləyib. Layihədə Cənubi Qafqaz ölkələrinə genişləndirilmiş dəstək ayrılması nəzərdə tutulur ki, bu da ABŞ-nin regiondakı strateji maraqlarının irəlilədilməsinə xidmət edir”, - deyə müəllif bildirib.
Nəşr qeyd edib ki, qanuna əsasən, region ölkələrinə ayrılacaq vəsaitlər sülhün, sabitliyin, inteqrasiyanın və qarşılıqlı əlaqələrin gücləndirilməsinə, həmçinin ikitərəfli strateji tərəfdaşlığın inkişafına yönəldiləcək.
“Komitə Dövlət katibini qanunun qəbulundan sonra 90 gün ərzində TRIPP (Zəngəzur dəhlizi-red.) təşəbbüsü çərçivəsində vəsaitlərin bölgüsü və görülən tədbirlər barədə Konqresə ətraflı hesabat təqdim etməyə də çağırıb. Bu proseslər Qərbin Paşinyanın hakimiyyətdə qalmasını təmin etmək üçün bütün imkanlardan istifadə edəcəyini göstərir”, - deyə nəşr vurğulayıb.
Alpər Mövludoğlu
Ordu.az
