Ordu.az xəbər verir ki, bu barədə Türkiyə KİV-ləri məlumat yayıb.
Türkiyənin və Avropanın ən böyük müdafiə, aviasiya və kosmos sənayesi klasteri “SAHA İstanbul”un təşkilatçılığı ilə keçirilən SAHA 2026 Beynəlxalq Müdafiə, Aviasiya və Kosmos Sənayesi Sərgisi mayın 5-9-da İstanbul Sərgi Mərkəzində keçiriləcək.
Sektorun istehsal potensialını qlobal vitrinə çıxarmağı hədəfləyən OSSA sərgi sahəsində qurulan 156 kvadratmetrlik stendində müdafiə sənayesinə kritik həllər təqdim edən 11 səriştəli üzv şirkəti bir dam altında bir araya gətirir. Bundan başqa, çox sayda OSSA üzvü şirkət sərgiyə öz stendləri ilə qatılıb məhsul və imkanlarını tanıdacaq.
Türkiyə sənayesinin texnoloji səriştəsini təmsil edən “Tecus”, “Tolga Plastik”, “Dora Makina”, “TIC Gözetim”, “Pars Savunma”, “Bosan Savunma”, “Akalın Isıl İşlem”, “Teksan Hidrolik”, “Ankara Bronz”, “KTS Kaya Otomotiv” və “İhamer” OSSA tərkibində yerli istehsal imkanlarını nümayiş etdirəcək.
Mexaniki emaldan istilik emalına, hidravlik sistemlərdən müdafiə texnologiyalarına qədər geniş spektrdə xidmət göstərən üzv şirkətlər sərgi müddətində həm yerli əsas podratçılarla, həm də beynəlxalq nümayəndə heyətləri ilə strateji əməkdaşlıq görüşləri keçirərək Türkiyənin ixrac hədəflərinə töhfə verməyi məqsəd qoyur.
OSSA bu güclü ortaq iştirak modeli ilə KOBİ-lərin qlobal tədarük zəncirindəki rolunu möhkəmləndirərkən, Türkiyə müdafiə ekosisteminin kollektiv çalışma mədəniyyətini və istehsal intizamını bir daha gözlər önünə sərir.
SAHA-ya daşınacaq imkanlar
OSSA üzvlərindən “Tecus” mexaniki emal texnologiyalarına fokuslanaraq bazarda istifadə olunan CNC dəzgahlarının səmərəliliyini artıracaq texnologiyaları sənayeyə qazandırır.
“Dora Makina” müdafiə və aviasiya sektorları üçün yüksək dəqiqlikli mexaniki emal, elektromexaniki sistemlər və qabaqcıl mühəndislik həlləri təqdim edir.
“Pars Savunma” müdafiə və aviasiya layihələrində dizayn və istehsal səriştələri ilə yer alaraq, ixtisaslı layihələr üçün yerli istehsal həlləri hazırlayır.
“Ankara Bronz” xüsusilə bürünc ərintiləri və strateji metal hissələrin istehsalına fokuslanır.
“Akalın Isıl İşlem” müdafiə, avtomobil və maşınqayırma sektorlarına yönəlmiş atmosfer nəzarətli sobalar və vakuum texnologiyaları ilə müasir istilik emalı prosesləri və laboratoriya xidmətləri göstərir.
“Bosan Savunma” metalların istilik emalı, sərtləşdirilməsi və səth örtüyü sahələrində ixtisaslaşmış həll tərəfdaşı kimi fəaliyyət göstərir.
“Tolga Plastik” plastik inyeksiya texnologiyaları və plastik qəlib istehsalı sahəsində fəaliyyət göstərir.
“Teksan Hidrolik” hidravlik hortum rakorları, boru birləşdirmə elementləri və presləri istehsal edir, müdafiə sənayesi sistemləri üçün mexaniki emal və sızdırmazlıq həlləri təqdim edir.
“KTS Kaya Otomotiv” elektron/elektromexaniki sistemlər, sensor texnologiyaları və geyilə bilən material texnologiyaları kimi qabaqcıl sahələrdə dizayn və mühəndislik xidmətləri göstərir.
“İhamer” pilotsuz uçuş aparatlarından güc elektronikası sahəsindəki həllərə qədər geniş məhsul çeşidi təqdim edir.
“TIC Gözetim” məhsul uyğunluğunun qiymətləndirilməsi, tədarük zənciri təhlükəsizliyi, informasiya təhlükəsizliyi və əməliyyat yoxlaması xidmətləri ilə müdafiə layihələrinin standartlara uyğunluğunu yoxlayır.
Sektorlar da, KOBİ-lər də inkişaf edir
OSSA İdarə Heyətinin sədri İbrahim Yarsan AA müxbirinə açıqlamasında SAHA 2026-nın yerli və milli müdafiə sənayesinin qlobal rəqabət qabiliyyətini nümayiş etdirmək baxımından dəyərli platforma olduğunu deyib.
Türkiyə müdafiə və aviasiya sənayesi ilə birlikdə bu inkişafa töhfə verən KOBİ-lərin də mühüm inkişaf içində olduğunu vurğulayan Yarsan SAHA 2026-da bunun nümunələrini ziyarətçilərlə görüşdürəcəklərini bildirib. Yarsan bu qiymətləndirməni verib:
“OSTİM Müdafiə və Aviasiya Klasteri olaraq 156 kvadratmetrlik sahədə fərqli imkanlara malik 11 üzvümüzlə birlikdə nümayiş etdirdiyimiz bu birlik KOBİ-lərimizin ekosistemdəki kritik rolunu bir daha göstərir. Sektorumuzun səsini dünyaya çatdırmaq nöqtəsində “Anadolu” Agentliyinin göstərdiyi fasiləsiz və güclü dəstəyi çox dəyərli hesab edirik. SAHA 2026-da qurduğumuz bu körpüləri 2026-cı il oktyabrın 14-16-da keçirəcəyimiz və sektorun digər mühüm görüş nöqtəsi olacaq “IDA Türkiye” ilə bir addım daha irəli aparacağıq. Məqsədimiz Ankara başda olmaqla bütün sektorumuzun istehsal gücünü beynəlxalq əməkdaşlıqlarla taclandırmağa davam etməkdir”.
Sevinc Əliyeva
Ordu.az
