Ordu.az xəbər verir ki, bunu Ermənistan Dövlət Gəlirləri Komitəsinin keçmiş sədri, “Birliyin qanadları” partiyasının seçki siyahısında ikinci sırada olan Davit Ananyan bəyan edib.
Ermənistan Baş naziri Nikol Paşinyanın və Rusiya prezidenti Vladimir Putinin Moskvadakı məlum görüşünü şərh edən Davit Ananyan qeyd edib ki, İrəvanın Avrasiya İqtisadi Birliyinə üzvlüyü ilə bağlı səsləndirilən ifadələr siyasi və siyasi-linqvistik baxımdan o qədər də qəbulolunan deyil.
Ananyan bildirib ki, bu, müttəfiqə daha yaxşı yer axtardığını və tapana qədər onunla dostluq edəcəyini deməyə bənzəyir.
Onun sözlərinə görə, mesajlar cəmiyyətlərə və bütün dünyaya ünvanlandığı halda belə şeyləri dövlət başçılarına açıq formada demək yolverilməzdir.
“Əsas mövzuya gəlincə, Avrasiya İqtisadi Birliyində qalmaq və ya qalmamaq sualının cavabı məntiq çərçivəsində verilməlidir, özü də Avrasiya İqtisadi Birliyi ilə münasibətlər Rusiya ilə münasibətlərimiz kontekstində qurulmalıdır. Yəni daha vacib suala cavab vermək lazımdır: hansı mərhələdə gələcəkdən nə gözləyirik və Rusiya ilə uzun yol keçmək niyyəti varmı?”, - deyə Ananyan bildirib.
O xatırladıb ki, Avrasiya İqtisadi Birliyinin büdcəsinin əsas hissəsi, təxminən 74 faizi Rusiyanın payına düşür və əsas maliyyə yükünü də məhz o daşıyır.
Ananyan deyib ki, Ermənistanın payı 1,22 faiz təşkil edir.
Eyni zamanda, Ermənistan Dövlət Gəlirləri Komitəsinin keçmiş sədri qeyd edib ki, siyasi münasibətlər iqtisadi münasibətləri tamamlayır, Avrasiya İqtisadi Birliyində isə iki türk dövləti var və onlar başqa formatlarda Azərbaycan və Türkiyə ilə eyni masa arxasında oturub qərarlar qəbul edirlər.
“Bir çox hallarda Ermənistanın maraqlarından irəli gəlməyən regional qərarlar qəbul olunur. Sual vermək lazımdır: Avrasiya İqtisadi Birliyi həmin ölkələrlə münasibətləri inkişaf etdirmək mümkün olan platformadırmı? Beləliklə, Avrasiya İqtisadi Birliyi məzmun baxımından mürəkkəb və çoxqatlı münasibətləri birləşdirir, Ermənistan isə buna təkcə iqtisadiyyat deyil, həm də siyasət prizmasından baxmalı, Rusiya ilə münasibətlərə prioritet verməlidir”, - deyə Ananyan qeyd edib.
Ermənistan iqtisadiyyatının Avrasiya İqtisadi Birliyindən çıxmaqla nə itirəcəyi barədə suala cavab olaraq Davit Ananyan xatırladıb ki, Ermənistanın xarici ticarət dövriyyəsinin 38-40 faizi Rusiyanın payına düşür.
“Avrasiya İqtisadi Birliyində birlik ərazisinə daxil olan istənilən mal Avrasiya İqtisadi Birliyi malına çevrilir, bu da erməni tərəfinə böyük imkanlar verir və biznesmenlərimiz bundan istifadə edirlər. İxrac strukturunda açıq şəkildə Ermənistanda istehsal olunmayan mallar üstünlük təşkil edir. Rusiya ilə münasibətlər həmişə xarici ticarətin böyük hissəsini təşkil edib. Yuxarıda qeyd olunan görüş zamanı Rusiya prezidenti çıxmaq perspektivləri haqqında birbaşa mətnlə dedi: energetika, qaz və sair”, - deyə Davit Ananyan xatırladıb.
Rusiya Təhlükəsizlik Şurası katibinin səsləndirdiyi rəqəmlərə gəlincə, Ermənistan Dövlət Gəlirləri Komitəsinin keçmiş sədri onları təsdiqləməyə və ya təkzib etməyə tələsməyib.
O qeyd edib ki, Rusiya tərəfi mümkün itkilərlə bağlı ÜDM-in 23 faizi həcmində rəqəmlər gətirir, bu da təxminən 2,3 trilyon dram təşkil edir.
“Onların bunu necə hesabladığını, ikinci dərəcəli nəticələri nəzərə alıb-almadıqlarını demək çətindir, amma əminəm ki, itkilər mütləq olacaq.
İtkiləri Avropa İttifaqına üzvlüklə kompensasiya etmək mümkündürmü? Bəlkə bu halda bunu müzakirə etməyə dəyər? Quruluşların qarşı-qarşıya qoyulmasına yalnız rəqəmlər baxımından baxmaq olmaz. Avropa İttifaqının hansı vəziyyətdə olduğunu, orada bizi gözləyib-gözləmədiklərini, Ermənistan iqtisadiyyatının Avropa standartlarına uyğun olub-olmadığını və Avropa İttifaqının üzvü olmaqla istehsalçı ölkəyə çevrilib-çevrilməyəcəyini görmək lazımdır. Avrasiya İqtisadi Birliyində qalmaq və konsensus qərarlarının qəbul edilməsində iştirakçı olmaq, statusu saxlamaq və üzv olmadan Avropa ilə, xüsusən onun ayrı-ayrı ölkələri ilə münasibətləri dərinləşdirmək mümkündürmü? Bu mümkündür və məhz həmin müddətdə iqtisadiyyatı diversifikasiya etməyə, ixracyönümlü elm tutumlu iqtisadiyyat yaratmağa, onu tanınan etməyə çalışmaq və yalnız belə mənzərə olduqdan sonra növbəti mərhələdə hara getmək barədə düşünməyə başlamaq lazımdır. Əgər Avrasiya İqtisadi Birliyi ilə münasibətlərin dalana apardığını görürsənsə, əlbəttə, başqa həllər lazımdır. Amma buna qədər diversifikasiya olunmuş iqtisadiyyata malik olmaq lazımdır”, - deyə Ananyan qeyd edib.
O bildirib ki, 2018-ci ildən sonra Avropa İttifaqı ilə genişləndirilmiş tərəfdaşlığı dərinləşdirmək imkanı olub, lakin bu edilməyib.
“İndi Avropa İttifaqına üzv olmaq ümidi ilə Ermənistanın Avrasiya İqtisadi Birliyindən çıxması barədə danışmaq siyasi avantüradır. Eyni zamanda bu, manipulyasiyadır, çünki bu hakimiyyət Avropa İttifaqına can atmır, özünü təqdim etdiyindən daha çox rusiyayönümlüdür”, - deyə Davit Ananyan bəyan edib.
O əlavə edib ki, mövzu seçkiqabağı dövrdə manipulyasiyalar və qarşıdurmalar üçün bəhanə kimi istifadə olunur: “Bu dövr “Vətəndaş Müqaviləsi” partiyası üçün əslində hələ iki il əvvəl başlayıb”.
Alpər Mövludoğlu
Ordu.az
