Ordu.az xəbər verir ki, bu saziş Türkiyə müdafiə sənayesinin Asiya-Sakit okean bölgəsindəki mövcudluğunu gücləndirən mühüm addım kimi qiymətləndirilir.
Saziş yüksək səviyyəli iştirakla imzalanıb
Memorandumu “Nurol Makina”nın baş direktor müavini Anıl Karel ilə “Nadicorp/Badanbas”ın icraçı direktoru Mohammad Imran Mohd Bin Nadzmi imzalayıb.
Tərəflər sazişi “yalnız bir iş imkanı deyil, etimad, təcrübə paylaşımı və qarşılıqlı inkişaf üzərində qurulmuş uzunmüddətli strateji tərəfdaşlıq” kimi xarakterizə ediblər.
Malayziyada yerli istehsal və ixrac hədəfi
Saziş çərçivəsində 4x4 zirehli vasitələrin Malayziyada lisenziyalı istehsalı həyata keçiriləcək. İstehsal olunan vasitələrin yalnız daxili bazarla məhdudlaşmayaraq Asiya-Sakit okean bölgəsi ölkələrinə ixracı da planlaşdırılır.
Bu çərçivədə Malayziyanın Türkiyə zirehli vasitə texnologiyaları üçün regional istehsal və ixrac bazasına çevrilməsi hədəflənir.
“Ejder Yalçın” və NMS platformaları istehsal olunacaq
İstehsal proqramı çərçivəsində “Nurol Makina”nın sahədə özünü sübut etmiş platformaları olan “Panthera” 4x4 (Ejder Yalçın) və NMS 4x4 vasitələri ön plana çıxır.
Bu platformaların:
Yüksək qoruma səviyyəsi
Üstün hərəkət qabiliyyəti
Modulyar dizayn quruluşu
kimi xüsusiyyətləri ilə xüsusilə asimmetrik təhdidlərə qarşı effektiv həllər təqdim etdiyi bildirilir.
Texnologiya transferi və yerli imkanların inkişafı
Sazişin mühüm istiqamətlərindən biri də texnologiya transferi olacaq. Bu çərçivədə Malayziyanın müdafiə sənayesində yerlilik nisbətinin artırılması və davamlı istehsal infrastrukturunun yaradılması hədəflənir.
Yerli istehsal modeli sayəsində maya dəyəri üstünlüyü, sürətli təhvil və logistika rahatlığı da təmin olunacaq.
Mövcud əməkdaşlıq yeni mərhələyə daşınıb
İki şirkət arasındakı əməkdaşlıq daha əvvəl də konkret nəticələr verib. “Nurol Makina” “Nadicorp” vasitəsilə Malayziya Silahlı Qüvvələrinə 20 ədəd “Panthera” 4x4 (Ejder Yalçın) zirehli vasitə təhvil verib.
Bu vasitələr BMT Müvəqqəti Livan Qüvvələri (UNIFIL) tərkibində Malayziya birlikləri tərəfindən fəal istifadə olunur və sahədə etibarlılığını sübut edib.
Sevinc Əliyeva
Ordu.az
