Ordu.az xəbər verir ki, bu barədə BELTA agentliyi məlumat yayıb.

Lukaşenko bu açıqlamaları Moskva vilayətinin qubernatoru Andrey Vorobyovla görüşü zamanı səsləndirib.

“Məhz burada yaxın vaxtlarda Zelenskinin nümayəndələri olmuşdular. Mən onlara açıq şəkildə dedim: “Uşaqlar, bunu prezidentinizə çatdırın. Əgər o hesab edirsə ki, bizimlə bu cür danışmaq və üstəlik bizi müharibəyə cəlb etmək mümkündür, onda anlamalıdır ki, müharibənin xarakteri dərhal dəyişəcək. Bu, tamamilə başqa bir müharibə olacaq”, - deyə Lukaşenko bildirib.

Belarus Prezidenti qeyd edib ki, bu bəyanata cavab da alıblar: “Prezident və nümayəndələri bunu başa düşürlər. Buna görə də gəlin razılığa gələk. Əsaslı şəkildə razılaşmaq lazımdır”.

Lukaşenko əlavə edib ki, “toz qaldırmağa, qışqırmağa və ya ruslara qarşı nümayişkaranə hərəkətlər etməyə ehtiyac yoxdur”.

“Gəlin insan kimi davranaq. Rusiyanın nə olduğunu və bizim kim olduğumuzu anlayaraq hərəkət edək. Bu anlayış da mövcuddur”, - deyə o vurğulayıb.

Belarus lideri ölkəsinin müharibəyə cəlb edilməsinin yolverilməz olduğunu bildirib.

“Bizi müharibəyə sürükləməyə çalışmaq lazım deyil. Guya Belarusdakı Rusiya səfiri Boris Qrızlov bunun üçün hansısa proses təşkil edir. Mən bu mövzunu Rusiya Prezidenti ilə dəfələrlə müzakirə etmişəm. Əgər qarşı tərəfdə əsasən ərazi müdafiə qüvvələri dayanırsa, biz necə ukraynalılarla döyüşə bilərik? Biz həmin mexanizatorlara, südçülərə və fəhlə oğlanlara atəş açmalıyıqmı? Onlar belaruslarla döyüşmək istəmirlər. Biz də ukraynalılarla döyüşmək istəmirik”, - deyə Lukaşenko bildirib.

O vurğulayıb ki, Belarusun mövqeyi sülhpərvərdir.

“Lakin istənilən vəziyyətdə biz Rusiyanın yanında olacağıq”, - deyə Belarus Prezidenti əlavə edib.

Sevinc Əliyeva
Ordu.az