Ordu.az xəbər verir ki, bu barədə xarici KİV-lər məlumat yayıb.

“Onlar deməyi sevirlər ki, guya mən İrana altı həftəyə qalib gələcəyimə söz vermişdim, halbuki əslində hərbi baxımdan bu, daha tez baş verdi. Amma mən onların ABŞ-ni sonradan o qədər də faydalı olmadığı üzə çıxacaq bir saziş bağlamağa tələsdirməsinə imkan verməyəcəyəm. Mənim üzərimə saziş bağlamaq üçün “təzyiq” göstərildiyi barədə saxta xəbərlər oxumuşam. BU, DOĞRU DEYİL. Mən heç bir təzyiq altında deyiləm, halbuki hər şey baş verəcək və nisbətən tez baş verəcək. Zaman mənim düşmənim deyil. Əhəmiyyət daşıyan yeganə məsələ odur ki, biz nəhayət, 47 ildən sonra digər prezidentlərin yaratdığı qarışıqlığı düzəldəcəyik, çünki onlarda İran məsələsində edilməli olanı etmək üçün nə cəsarət, nə də uzaqgörənlik var idi.

Biz bütün bunlarda iştirak edirik və bu, DÜZGÜN şəkildə ediləcək. Biz zəif, laqeyd demokratların, illər boyu İran təhlükəsindən və onunla bağlı nəsə edilməli olduğundan danışan, amma indi bunu mən etdiyim üçün ordumuzun və Tramp administrasiyasının nailiyyətlərini kiçiltmək istəyən bütün xainlərin buna kölgə salmasına imkan verməyəcəyik.

Bu, tamamilə Venesuela miqyasında həyata keçirilir, sadəcə bu, daha böyük və daha mürəkkəb əməliyyatdır. Nəticə eyni olacaq. Mən ilk müddətimdə ölkəmizin indiyədək gördüyü ən böyük ordunu qurdum, o cümlədən ABŞ Kosmik Qüvvələrini yaratdım. İkinci müddətimdə isə ordumuzu düzgün və ağıllı şəkildə istifadə edəcəyəm ki, anlayışı və səriştəsi daha az olan insanların qoyub getdiyi problemləri həll edim. AMERİKANI YENİDƏN BÖYÜK EDƏK”, - deyə Tramp bildirib.

O, başqa bir paylaşımında isə qeyd edib: “İranla bağlanacaq saziş Birgə Hərtərəfli Fəaliyyət Planından, adətən “İran nüvə sazişi” adlandırılan sənəddən qat-qat yaxşı olacaq. Həmin sazişi Barak Obama və yuxulu Co Bayden hazırlayıb və bu, millətimizin təhlükəsizliyi üçün tarixdəki ən pis razılaşmalardan biri idi.

Bu, nüvə silahına aparan zəmanətli yol idi. Bizim üzərində işlədiyimiz sazişdə isə bu olmayacaq və ola da bilməz. Onlar faktiki olaraq 1,7 milyard dollar nağd pulu “Boing 757” təyyarəsinə yükləyib İrana göndərmişdilər ki, İran rəhbərliyi onu istədiyi kimi xərcləsin. O, bütün bu pulu Vaşinqton, Virciniya və Merilend banklarından çıxarmışdı. Həmin bankirlər bildiriblər ki, əvvəllər heç vaxt belə bir şey görməyiblər. Bundan əlavə, İrana yüz milyardlarla dollar ödənilib. Əgər mən bu “sazişi” ləğv etməsəydim, nüvə silahı İsrailə və bütün Yaxın Şərqə, o cümlədən sevimli Amerika hərbi bazalarımıza qarşı istifadə olunacaqdı.

Saxta xəbərlər Birgə Hərtərəfli Fəaliyyət Planı haqqında danışmağı sevirlər, halbuki bunun TƏHLÜKƏLİ və ölkəmiz üçün tam rüsvayçılıq olduğunu bilirlər. Əgər saziş Tramp dövründə qəbul olunarsa, bu, təkcə İsrail və Yaxın Şərq üçün deyil, həm də Avropa, Amerika və bütün dünya üçün sülh, təhlükəsizlik və əmin-amanlıq təmin edəcək. Bu, bütün dünyanın fəxr edəcəyi bir şey olacaq və fəaliyyətsiz, qorxaq rəhbərlik üzündən yaşadığımız rüsvayçılıq və alçalma illərini əvəz edəcək”.

Sevinc Əliyeva
Ordu.az