Ordu.az xəbər verir ki, bu barədə xarici KİV-lər məlumat yayıb.
Almaniyanın paytaxtı Berlində keçirilən Ukrayna Müdafiə Təmas Qrupu toplantısından sonra danışan müdafiə naziri Dilan Yeşilgöz-Zegerius bildirib ki, istehsal həm Ukraynada, həm də Niderlandda həyata keçiriləcək.
“PUA-lar müasir döyüş meydanında kritik rol oynayır. Ukraynalılar Rusiyanın fasiləsiz hücumlarını dəf etmək üçün bu sistemlərdən inanılmaz bacarıqla istifadə edir və bunda olduqca uğurludurlar”, - deyə Yeşilgöz-Zegerius bildirib.
O əlavə edib: “Ukrayna ilə yaxşı əməkdaşlıq sayəsində biz də bundan birbaşa öyrənirik. Bu vəziyyət iş dünyamız üçün də imkanlar yaradır. Yaxın əməkdaşlıq hər iki ölkə üçün həqiqi qazan-qazan vəziyyəti yaradır”.
İnvestisiyanın detalları ilə bağlı əlavə məlumat paylaşılmayıb. Lakin açıqlama Niderlandın daha əvvəl Ukrayna ilə birlikdə dərin zərbə qabiliyyətinə malik PUA istehsalı üçün öhdəsinə götürdüyü 110 milyon avroluq (127 milyon dollar) dəstəkdən sonra gəlib.
Sözügedən investisiya Ukraynalı müdafiə şirkətlərinin NATO ölkələrində istehsal müəssisələri qurmasına imkan verən “Build with Ukraine” təşəbbüsü çərçivəsində qiymətləndirilir. Bu təşəbbüs istehsal fəaliyyətini Rusiya hücumlarından qorumağı və Ukrayna müdafiə sənayesinin Qərblə inteqrasiyasını gücləndirməyi hədəfləyir.
Bürokratiya istehsal planlarını çətinləşdirir
Bununla belə, həddindən artıq bürokratiyanın Ukrayna şirkətlərinin Niderland da daxil olmaqla Avropada istehsallarını genişləndirməsini çətinləşdirdiyi bildirilir.
Niderland dövlət yayımçısı NOS-un məlumatına görə, “Fire Point” şirkətinin direktoru və baş konstruktoru Denis Ştilerman deyib: “Niderland bizim üçün çox iş görür, amma nəsə inşa edə bilmək üçün bir il yarım gözləmək məcburiyyətində qalmaq? Bizim bu qədər vaxtımız yoxdur”.
“Fire Point” F-5 “Flamingo” qanadlı raketi də daxil olmaqla zərbə PUA-ları və raket sistemləri hazırlayan yeni Ukrayna müdafiə şirkəti kimi önə çıxır.
Gecikmələrin səbəbi ilə bağlı qiymətləndirmə aparan Niderland Müdafiə və Təhlükəsizlik Sənayesi Fondunun direktoru Hans Huigen isə vurğulayıb ki, zərbə silahları və sursat istehsalı müdafiə məqsədli avadanlıqlarla müqayisədə daha mürəkkəb lisenziya proseslərinə tabedir. O deyib: “İnvestorlar da bu sahəyə vəsait qoymaq məsələsində çox vaxt istəksiz davranırlar”.
Huigen mümkün həll yolu kimi Niderlandın PUA-ları tam istehsal edib raket komponentlərini tədarük edə biləcəyini, son montajın isə Ukraynada həyata keçirilə biləcəyini bildirib. O əlavə edib ki, bu model artıq tətbiq olunmağa başlanıb.
Sevinc Əliyeva
Ordu.az
