Ordu.az xəbər verir ki, sözügedən satışın Almaniyanın dəniz müdafiə qabiliyyətlərini artırması və NATO müttəfiqləri ilə birgə işləmə imkanlarını gücləndirməsi hədəflənir.
F127 freqat proqramı çərçivəsində kritik tədarük
Təsdiqlənən satışın Almaniyanın yeni nəsil F127 hava hücumundan müdafiə freqatı proqramı ilə birbaşa bağlı olduğu bildirilir. Təhlükəsizlik mühitindəki dəyişiklik səbəbindən 6 gəmidən 8 gəmiyə yüksəldilən proqram çərçivəsində hər bir platformanın qabaqcıl hava və raketdən müdafiə qabiliyyətlərinə malik olması planlaşdırılır.
Yeni freqatların 96-ya qədər şaquli buraxılış sistemi hüceyrəsi daşıya biləcəyi bildirilir.
AEGIS sistemi və SPY-6 radarları paketin mərkəzindədir
Satış paketi çərçivəsində 8 gəmi üçün AEGIS əsaslı inteqrasiya edilmiş döyüş idarəetmə sistemi ilə birlikdə AN/SPY-6 aktiv fazalı radarların tədarükü nəzərdə tutulur.
Bununla yanaşı, “Mk 41” şaquli buraxılış sistemi, müştərək nişanalma qabiliyyəti (Cooperative Engagement Capability) və GPS əsaslı mövqe və zamanlama sistemləri də paketdə yer alır.
Genişmiqyaslı sensor və silah inteqrasiyası
Paketdə həmçinin komanda-idarəetmə prosessorları, çoxfunksiyalı məlumat paylama sistemləri, “Mk 45” dəniz topu və AN/SLQ-32 radioelektron mübarizə sistemləri kimi müxtəlif komponentlər mövcuddur.
Əlavə olaraq AN/SPQ-9B radarları, ətalətli naviqasiya sistemləri, dost-düşmən tanıma sistemləri və kriptoqrafik avadanlıqlar da tədarük ediləcək sistemlər arasında yer alır.
Bu genişmiqyaslı struktur platformaların həm hava hücumundan müdafiə, həm də çoxqatlı dəniz döyüş tapşırıqlarında effektivliyini artırmağı hədəfləyir.
Təlim, logistika və inteqrasiya dəstəyi də daxildir
Satış paketi yalnız avadanlığı deyil, həmçinin təlim, texniki dəstək, mühəndislik xidmətləri, sınaq avadanlıqları və ehtiyat hissələrini də əhatə edir.
Bundan əlavə, sistem inteqrasiyası və əməliyyat hazırlığı üçün zəruri proqram təminatı və sənədləşdirmə dəstəyinin də təmin ediləcəyi bildirilir.
NATO daxilində birgə işləmə qabiliyyəti güclənəcək
ABŞ Dövlət Departamenti satışın ABŞ xarici siyasəti və milli təhlükəsizlik hədəfləri ilə uyğun olduğunu bildirib. Açıqlamada Almaniyanın qabiliyyətlərinin artırılmasının Avropadakı sabitliyi dəstəkləyəcəyi vurğulanıb.
Sözügedən sistemlərin Almaniyanın mövcud və gələcək dəniz təhdidlərinə qarşı daha effektiv cavab verməsini təmin edəcəyi və NATO əməliyyatlarında ABŞ ilə uyğunluğu artıracağı qeyd olunur.
Avropa sistemlərindən ABŞ texnologiyasına keçid diqqət çəkir
Razılaşma həyata keçirilərsə, bu, Almaniyanın mövcud Avropa mənşəli döyüş sistemlərindən ABŞ istehsalı AEGIS və SPY-6 infrastrukturuna yönəlməsi anlamına gələcək.
Bu dəyişikliyin xüsusilə pilotsuz sistemlərə və yeni nəsil təhdidlərə qarşı daha qabaqcıl müdafiə qabiliyyətləri təqdim etməsi gözlənilir.
Əsas podratçılar “Lockheed Martin” və RTX-dir
Proqramın əsas podratçıları arasında “Lockheed Martin” və RTX yer alır.
Yekun razılaşmanın ABŞ Xarici Hərbi Satış (FMS) prosesi çərçivəsində zəruri təsdiqlərin tamamlanması və iki ölkə arasında aparılacaq danışıqlardan sonra qüvvəyə minəcəyi bildirilir.
Sevinc Əliyeva
Ordu.az
