Ordu.az xəbər verir ki, bu barədə “SurveyMonkey” şirkətinin keçirdiyi “NBC News Decision Desk” sorğusunun nəticələrində bildirilir.
Ümumilikdə, sorğuda iştirak edən yetkinlərin 37 faizi Trampın prezident kimi fəaliyyətini bəyənib, 63 faizi isə dəstəkləməyib. Daha 50 faiz onun işinə qəti şəkildə qarşı olduqlarını bildirib ki, “NBC News Decision Desk”ə görə, bu, onun fəaliyyət reytinqini ikinci prezidentliyi dövründə ən aşağı nöqtəyə endirib.
Respondentlərin üçdə ikisi həmçinin inflyasiya və İran münaqişəsinə qarşı mübarizədə Trampın addımlarına qarşı çıxıb.
ABŞ prezidenti hələ də əsas seçici bazasının böyük dəstəyindən yararlansa da, respublikaçılar arasında bu göstərici yanvarın sonu və fevralın əvvəlində keçirilmiş son sorğu ilə müqayisədə aşağı düşüb. Yeni sorğuda respublikaçıların 83 faizi Trampı müsbət qiymətləndirib ki, bu da ilin əvvəlindəki göstəricidən 4 faiz bəndi azdır. Trampın fəaliyyətini tam bəyənən respublikaçıların payı isə 6 bənd azalaraq 58 faizdən 52 faizə düşüb.
Ümumilikdə, amerikalıların üçdə biri ölkənin düzgün yolda olduğunu düşünür, üçdə ikisi isə yanlış istiqamətdə getdiyini hesab edir. Bu, Trampın ötən il yenidən seçilməsindən bəri ən bədbin proqnozdur.
İqtisadiyyat amerikalıların əsas narahatlığı olaraq qalır. Sorğuda iştirak edənlərin 29 faizi bunun hazırda onlar üçün ən vacib problem olduğunu bildirib, 24 faizi demokratiyaya təhdidlərdən, 12 faizi səhiyyədən, 10 faizi isə cinayətkarlıq və təhlükəsizlikdən narahatdır.
Onlardan hazırda hansı iqtisadi problemin daha vacib olduğu soruşulduqda, inflyasiya və həyatın bahalaşması açıq üstünlük qazanıb. Bu variantı 45 faiz seçib ki, bu da istənilən digər variantdan nəzərəçarpacaq dərəcədə yüksəkdir.
Amerikalıların yalnız 32 faizi Trampın inflyasiya və həyatın bahalaşmasına qarşı mübarizədəki addımlarını bəyəndiyini bildirib, 68 faizi isə bunun əleyhinə çıxıb. Amerikalıların əksəriyyəti - 52 faiz bu məsələdə Trampın qərarlarına qəti şəkildə qarşı olduqlarını deyib.
Qəti etiraz edən amerikalıların payı ötən yayla müqayisədə 7 bənd artıb. İnflyasiya ilə mübarizədə Trampın addımlarını bəyənən respublikaçıların sayı isə 73 faiz olub ki, bu da əvvəlki sorğudakı göstəricidən 10 bənd azdır.
Daha çox amerikalı (40 faiz) bir il əvvəllə müqayisədə şəxsi maliyyə vəziyyətinin indi daha pis olduğunu bildirib. İqtisadi vəziyyətinin yaxşılaşdığını deyənlərin sayı isə 19 faiz olub ki, bu da Trampın ikinci prezidentliyi dövründə keçirilən bütün əvvəlki sorğularla müqayisədə daha aşağı göstəricidir.
Trampın İrana qarşı müharibəni aparması ilə bağlı amerikalıların baxışları aprelin 7-də atəşkəs elan olunmasından sonra əhəmiyyətli dərəcədə dəyişməyib. Həmin bəyanatdan sonrakı günlərdə amerikalıların təxminən üçdə biri müharibəni dəstəkləyib.
Demək olar ki, bütün demokratlar və müstəqil respondentlərin 82 faizi müharibəni bəyənməyib, respublikaçıların isə 74 faizi onu dəstəkləyib. Bununla belə, Trampın müharibədəki addımlarını dəstəkləməyən respublikaçıların payı (26 faiz) ümumilikdə onun fəaliyyətinə qarşı çıxan respublikaçıların sayından (17 faiz) daha yüksək olub.
Sevinc Əliyeva
Ordu.az
