Ordu.az xəbər verir ki, bu barədə AFP agentliyi məlumat yayıb.

İraqdakı bir çox həbsxanalar terror şübhəliləri ilə həddindən artıq doludur. Fevral ayında ABŞ-nin İŞİD-in 5700 saxlanılan üzvünü, o cümlədən yüzlərlə əcnəbini Suriyadan İraqa köçürməsi prosesi başa çatıb.

Beynəlxalq Məhkəmə Əməkdaşlığı Milli Mərkəzi (NCIJC) bildirib ki, “iki şübhəli, biri Finlandiyadan olan azyaşlı və digəri ABŞ-dən olan şəxs onların İŞİD terrorçuları olmadığı təsdiqləndikdən sonra öz ölkələrinin səlahiyyətli orqanlarına təhvil verilib”.

Məlumatda qeyd olunur ki, təhvil bütün hüquqi və məhkəmə prosedurları tamamlandıqdan sonra həyata keçirilib.

Məhkəmə orqanları bu iki şəxsin Suriyadan köçürülənlər arasında olub-olmadığını açıqlamayıb. İraqa çatdıqdan sonra məhkəmə qurumları təxminən 60 ölkədən olan şübhəliləri dindirməyə başlayıb, daha sonra onların barəsində məhkəmə prosesi başlanılıb.

Onların arasında 3543 suriyalı, 467 iraqlı və digər ərəb ölkələrindən 710 saxlanılan şəxs var. Bundan əlavə, Avropa, Asiya, Avstraliya və ABŞ daxil olmaqla 980-dən çox əcnəbi də mövcuddur.

İŞİD 2014-cü ildə Suriya və İraqda geniş yayılıb, kütləvi qətllər törədib və qadınlarla qızları cinsi köləliyə məcbur edib. ABŞ-nin rəhbərlik etdiyi qüvvələrin dəstəyi ilə İraq 2017-ci ildə ölkədə İŞİD üzərində qələbə elan edib, YPG isə iki il sonra Suriyada bu qruplaşmanı məğlub edib.

İraq məhkəmələri terror cinayətlərinə görə təqsirli bilinən şəxslər, o cümlədən xarici döyüşçülər barədə yüzlərlə ölüm hökmü və ömürlük həbs cəzası çıxarıb.

Sevinc Əliyeva
Ordu.az