Ordu.az xəbər verir ki, bu barədə “Ynet” məlumat yayıb.

Knessetin xarici işlər və müdafiə komitəsinin sədri təsdiqləyib ki, koalisiya məcburi hərbi xidmətin genişləndirilməsi ilə bağlı qanunvericiliyi, həmçinin on minlərlə ultraortodoks yəhudinin hərbi xidmətdən azad edilməsini və ehtiyat xidmət haqqında qanunu irəli sürməyi planlaşdırır.

Cümə axşamı keçirilən qapalı iclasda briqada generalı, şəxsi heyətin planlaşdırılması və gücləndirilməsi şöbəsinin rəhbəri Şey Tayeb bildirib ki, döyüşçülərə ehtiyac “kritik” səviyyədədir.

O xəbərdarlıq edib ki, mövcud vəziyyət uzun müddət davam edə bilməz. Tayebin bu açıqlaması Baş Qərargah rəisi, general-leytenant Eyal Zamirin son xəbərdarlığının fonunda səslənib. Zamir bildirib ki, İsrail elə bir ssenari ilə üzləşə bilər ki, bu halda “ordu öz-özünə zəifləyəcək”.

O əlavə edib ki, ehtiyat qüvvələr haqqında qanun, məcburi xidməti genişləndirən qanun və ultraortodoksların hərbi xidmətə cəlb olunmasını nəzərdə tutan qanun olmadan “İsrail Müdafiə Qüvvələri zəifləyəcək və xüsusilə müharibə dövründə öz vəzifələrini yerinə yetirə bilməyəcək”.

İsrail Müdafiə Qüvvələrinin sözçüsü, briqada generalı Effi Defrin bildirib ki, orduya təxminən 15 min əlavə şəxsi heyət, o cümlədən 7000-8000 döyüşçü lazımdır.

Knessetin yay sessiyası mayın 10-da başlayacaq və bu müddətdə koalisiya vergi güzəştləri ilə bağlı qanun layihəsini, eləcə də daha iki təşəbbüsü irəli sürməyi planlaşdırır.

Sevinc Əliyeva
Ordu.az