Ordu.az xəbər verir ki, bu barədə Ukrayna Prezidenti Volodimir Zelenski axşam müraciətində məlumat verib.

Zelenskinin sözlərinə görə, Ukrayna Rusiyanın işğalına cavab olaraq uzaqmənzilli və ortamənzilli sanksiya mexanizmlərindən istifadəni davam etdirir.

“Bunlar Rusiyanın başladığı və bitirməli olduğu bu müharibəyə qarşı ədalətli cavablarımızdır. Rusiya bu müharibəni Ukraynadan özü ilə aparmalıdır. Bizə bu müharibə lazım deyil”, - deyə Prezident bildirib.

O, Ankarada keçiriləcək NATO Sammiti ərəfəsində ikitərəfli əməkdaşlıq, xüsusilə hava hücumundan müdafiə sistemlərinin gücləndirilməsi məsələsinə diqqət çəkib. Zelenski raketdən müdafiə imkanlarının artırılması, Ukraynaya yeni sistemlərin verilməsi və Avropa üzrə ortaq raketdən müdafiə təşəbbüsünün inkişaf etdirilməsinin vacibliyini vurğulayıb.

“Bizə real nəticələr lazımdır. Raketdən müdafiə sahəsində bizimlə çalışan liderlərə və ölkələrə minnətdaram. Bu iş davam edir”, - deyə o əlavə edib.

Bundan əvvəl Zelenski müharibənin cari ilin sonunadək başa çata biləcəyinə ümid etdiyini bildirib. Moskva isə buna cavab olaraq Ukrayna qüvvələrinin Kremlin öz ərazisi hesab etdiyi bölgələrdən çıxacağı təqdirdə münaqişənin daha tez, hətta bir gün ərzində başa çata biləcəyini iddia edib.

Sevinc Əliyeva
Ordu.az