Ordu.az xəbər verir ki, bu barədə TASS-a müsahibəsində Rusiyanın baş nazirinin müavini Aleksey Overçuk bildirib.

“2024-cü ilin sentyabrında biz erməni tərəfdaşlarımızın diqqətini Aİ-yə üzv olmaq istəyinə dair onların bəyanatlarının Rusiya sahibkarlarının Ermənistanla ticarətə münasibətinə mənfi təsir göstərdiyi faktına yönəltdik”, - deyə o qeyd edib.

Overçuk, həmçinin vurğulayıb: “Aİ ilə yaxınlaşma barədə bu söhbətlər yalnız Rusiya-Ermənistan münasibətlərinə real olaraq 5,1 milyard dollara başa gəlib”.

Rusiya baş nazirinin müavini konkret rəqəmlər də açıqlayıb. O bildirib ki, 2024-cü ilin sonunda Rusiya ilə Ermənistan arasında qarşılıqlı ticarət 11,5 milyard dollar təşkil edib, lakin 2025-ci ildə ilkin məlumatlara görə bu göstərici təxminən 6,4 milyard dollara enəcək.

“Necə düşünürsünüz, əgər rus biznesi Ermənistandan sıxışdırılıb çıxarılsa, Rusiyada erməni biznesinin mövcudluğuna rus sahibkarları necə reaksiya verəcək? Və sonra nə baş verəcək? Mən düşünmürəm ki, nə Ermənistan, nə də Rusiya bu sualın cavabını bilmək istəyir, halbuki bu aydındır”, - deyə Overçuk bildirib.

Alpər Mövludoğlu
Ordu.az