Ordu.az xəbər verir ki, bu barədə Rusiyanın “Argumenti.ru” nəşri yazıb.
Nəşrə görə, Rusiyanın xarici işlər naziri Sergey Lavrov açıq şəkildə bəyan edib ki, Ermənistanın Aİ standartlarına keçidi Avrasiya İqtisadi Birliyinə (AİB) üzvlüklə bir araya sığmır.
“Burada İrəvanın Avropaya inteqrasiyası ilə bağlı hər hansı siyasi fikir ayrılığı yoxdur, sadəcə olaraq Avropa Birliyi və Avrasiya Alyansının qaydaları faktiki olaraq üst-üstə düşmür. Heç kim eyni lövhədə eyni vaxtda şahmat, dama və nərd oynaya bilməz.
Siyasət və diplomatiyadan kənarda, bugünkü Ermənistan həm də Erməni Apostol Kilsəsi ilə “toqquşmanın” acı təcrübəsini yaşayır. Üstəlik, rəsmi İrəvan öz təqiblərini “hibrid təhdidlərə qarşı mübarizə” kimi təqdim edir, Avropa isə bu ritorikanı 15 milyon avroluq yardım tranşı ilə əsaslandırır. Moskva bütün bu manevrlərə reaksiya verərək baş verənləri ümumi siyasətin kəskin dönüşünün bir hissəsi kimi xarakterizə edir. Bununla belə, heç bir illüziya olmamalıdır: siyasət adətən öz yerini riyaziyyata verir”, - deyə nəşr qeyd edib.
KİV bildirib ki, son iki il ərzində Ermənistanın ticarət balansı profisitli olsa da, bu, AİB və Rusiya, həmçinin İrəvanın əsas ticarət tərəfdaşları olan Almaniya, İran, ABŞ, Çin, Ukrayna və Türkiyə tərəfindən dəstəklənir.
“Əgər respublika Avropa standartlarını qəbul edərsə, bu, avtomatik olaraq Ermənistanın AİB-də iştirakını və bununla bağlı çox böyük iqtisadi yan təsirləri sual altına qoyacaq. Ermənistanın idxalı əsasən neft, təbii qaz, taxıl, rezin məmulatları, mantar, ağac materialları və elektrik avadanlıqlarından ibarətdir. 2025-ci ilin noyabrında ölkə idxala ixracdan qazandığından daha çox xərcləyib və bu fərq (ticarət kəsiri) genişlənərək 477,2 milyon dollara çatıb. Bir il əvvəl bu kəsir 442,6 milyon dollar təşkil edirdi. Bu, ixracın 17,3%, idxalın isə 14% azalması ilə bağlıdır.
Digər ölkələrlə ticarət etmək Ermənistan üçün çətindir. Ölkə dənizdən uzaqdır və qonşuları olan Türkiyə və Azərbaycanla sərhəd mübahisələri var. Buna görə də Ermənistan adətən idxala ixracdan qazandığından daha çox pul xərcləyir. Ermənistanın əsas ixrac malları metallar və qiymətli daşlardır, həmçinin enerji, içkilər, tərəvəz və meyvə də ixrac olunur”, - deyə müəllif yazıb.
Nəşr vurğulayıb ki, indi isə Qərb Ermənistan üçün “yaşıl keçid” və “diversifikasiya” pərdəsi altında tədricən ölkənin enerji kapitulyasiyasını hazırlayan bir enerji sistemi tələsi qurub.
“Məsələ burasındadır ki, bu Cənubi Qafqaz ölkəsi Rusiyadan nə qədər uzaq dursa, onun indiki kuratorları üçün bir o qədər yaxşıdır. İrəvandakı eyforiya administrasiyanın gözünü kor edərək ona Qərbin strateji planını görməyə imkan vermir. Həmin plan isə Rusiya ilə enerji əlaqələrini kəsmək və Ermənistanı Aİ-nin nəzarətində olan Türkiyə-Azərbaycan enerji sisteminə tabe etməkdir.
Bu yaxınlarda Paşinyan bildirib ki, “Tramp yolu” (Zəngəzur dəhlizi-red.) layihəsi çərçivəsində Ermənistan və Azərbaycanın enerji sistemləri bir-birinə bağlanacaq. Avropaya inteqrasiya tərəfdarı olan Paşinyan iddia edib: “Ermənistan və Azərbaycanın enerji sistemləri mütləq şəkildə bir-birinə bağlanacaq və qarşılıqlı olaraq, eyni şərtlərlə elektrik enerjisinin ixracı və idxalı imkanlarından bərabər faydalanacaqlar”, - deyə məqalədə qeyd edilib.
Nəşr bildirib. kİ, TRIPP layihəsi iddialı bir infrastruktur təşəbbüsüdür.
“Bunun mahiyyəti nəqliyyat marşrutlarının inkişafı üçün birgə müəssisənin yaradılmasıdır. Ermənistandan keçəcək bu yollar Azərbaycanın əsas hissəsi ilə onun eksklavı olan Naxçıvan arasında körpü rolunu oynayacaq. “TRIPP Development” şirkəti bu layihəni idarə edəcək. Ermənistan “Tramp yolu”nu layihənin 74%-lik payı müqabilində 49 illik müddətə ABŞ-nin icarəsinə verəcək. Paşinyan öz bəyanatında qeyd edib: “Layihə avtomobil, dəmir yolu və neft-qaz infrastrukturlarının tikintisini nəzərdə tutur. ABŞ hazırlıq işlərinin birinci mərhələsinə 140 milyon dollar investisiya yatırıb”.
Rusiya bütün bunları hələlik ultimatumsuz, mülayim tonla təqdim edir, lakin sadəcə dəqiqləşdirir: bu kimi şeylər “TikTok”da ola bilər, lakin dünya iqtisadiyyatında bu işləmir, Ermənistan seçim etməli olacaq”, - deyə nəşr qeyd edib.
Alpər Mövludoğlu
Ordu.az
