Ordu.az xarici KİV-lərə istinadən xəbər verir ki, 2025-ci il martın 28-də “Redstone Arsenal” bazasında ABŞ Quru Qoşunları Tədarük Komandanlığı tərəfindən imzalanan müqavilə çərçivəsində birinci mərhələdə 400 “PrSM Increment 1” raketinin çatdırılması nəzərdə tutulur.
Bu hərtərəfli müqavilə ABŞ-nin hazırkı MGM-140 ATACMS sistemlərini əvəz edəcək daha təkmil raket həllinə keçidində mühüm mərhələ hesab olunur.
2016-cı ildə istifadəyə verilmiş “PrSM” proqramı müasir döyüş meydanında ATACMS-in çatışmazlıqlarını aradan qaldırmaq üçün “Lockheed Martin” şirkətinin rəhbərliyi altında hazırlanıb.
İlk uğurlu sınaq buraxılışı 2019-cu il dekabrın 10-da Nyu-Meksikodakı “White Sands” poliqonunda həyata keçirilib, 2025-ci ilin fevralında isə HIMARS platformasından iki raketin eyni vaxtda atılması sistemin tam istehsal mərhələsinə hazır olduğunu göstərib.
2024-cü ildə Sakit okean regionunda keçirilən digər sınaq raketin hərəkət edən dəniz hədəflərinə qarşı effektivliyini sübut edib.
Təxminən 4 metr uzunluğu və 430 mm çapı ilə “PrSM” həm mənzil, həm də yük daşıma qabiliyyəti baxımından ATACMS ilə müqayisədə böyük üstünlüklər təklif edir. ATACMS sistemlərindən fərqli olaraq, M270 MLRS və M142 HIMARS buraxılış qurğuları hər podda 2 “PrSM”i yerləşdirə bilər. Bu, hər atışdan iki dəfə çox raket deməkdir.
“PrSM Increment 1”in uçuş məsafəsinin 500 kilometri keçdiyi və gələcək versiyaların hazırlanması ilə bu məsafənin 1000 kilometrə çatdırılmasının hədəfləndiyi bildirilib. Bu inkişaf bölmələrə risk etmədən daha dərin hədəfləri effektiv şəkildə vurmağa imkan verir.
Sevinc Əliyeva
Ordu.az
