Ordu.az xəbər verir ki, təqdimat Fransanın paytaxtı Paris şəhərində keçirilən “Eurosatory” sərgisində baş tutub.

Şirkətin tırtıllı texnika ailəsinin ən yeni üzvü olan KF51 “Panther” 120 mm əvəzinə 130 mm silaha sahibdir. 130 mm-lik silah sayəsində KF51-in atəşə hazır sursatlarının sayı azalır, nişanalma qabiliyyəti və atəş gücü artır. Tankın çəkisi 59 tondur.


Yeni tankın bütün silah sistemləri tam rəqəmsallaşdırılmış NGVA arxitekturası vasitəsilə tank komandirinin və topçunun optikası ilə atəş idarəetmə kompüterinə qoşulub. Bu xüsusiyyətlərin gələcəkdə Süni Zəka (SZ) tərəfindən dəstəklənməsi hədəflənir.

Tankın əsas silahı 130 mm-lik “Future Gun System” (FGS) silahıdır. Bu silah bütün mövcud və ehtimal olunan hədəflərə qarşı üstün atəş gücü təklif edir. Bundan əlavə, uzun mənzilli hücumlar və çoxsaylı hədəflərə qarşı atəş gücü təmin etmək üçün əlavə silah sistemləri tanka inteqrasiya oluna bilər.

Silahın avtoyükləyicisində 20 atışa hazır sursat var. Mövcud 120 mm-lik sistemlərlə müqayisədə, FGS 50 faizdən çox səmərəlilik təmin edir. 12,7 mm-lik koaksial pulemyot əsas silahlanmanı tamamlayır. Uzaqdan idarə olunan silah stansiyasını (RCWS) tanka inteqrasiya etmək mümkündür. “Eurosatory 2022”də təqdim edilən KF51 “Panther” tankları “Rheinmetall” şirkətinin 7.62 “Natter” uzaqdan idarə edilən silah sistemi ilə təchiz edilib.

“Rheinmetall”ın partnyoru “UVision” tərəfindən istehsal olunan “Hero 120” adlı “gəzən sursatlar” da tanka inteqrasiya oluna bilər. Döyüş çəkisi təxminən 59 ton olan KF51 500 kilometr uçuş məsafəsinə malikdir.

Sevinc Əliyeva
Ordu.az