Ordu.az xəbər verir ki, bu barədə Ermənistan Baş Prokurorluğu məlumat yayıb.
Məlumata görə, 2019-cu il mayın 17-də sənəd saxtalaşdırılması, hərbi xidmətdən yayınma, xidmətə səhlənkar münasibət maddələri üzrə Ermənistan Müdafiə Nazirliyinin Abovyan rayon hərbi polis şöbəsində cinayət işi açılıb. Həmin gün Kotayk vilayətinin Hrazdan şəhərinin 2000-ci il təvəllüdlü sakini törətdiyi cinayətdə ittiham edilərək həbs edilib.
Mayın 20-də ilkin istintaq araşdırma orqanında toplanmış sənədlər hərbi istintaq Baş idarəsinin 4-cü qarnizon istintaq şöbəsinə göndərilib. Araşdırma nəticəsində sənədlərin saxtalaşdırılması yolu ilə hərbi xidmətdən yayınan erməni hərbi qulluqçu ittiham olunan şəxs qismində cinayət məsuliyyətinə cəlb edilib və 2 ay müddətinə həbs olunub.
Qeyd edək ki, saxlanılan şəxs Dərəçiçək (Tsağkadzor) şəhərinin sabiq meri Qarun Mirzoyanın 19 yaşlı oğludur.
Cinayət işi üzrə ilkin istintaq araşdırması davam edir.
Alpər Mövludoğlu
Ordu.az
