Ordu.az xəbər verir ki, yayılan məlumatlara görə, Ukraynanın xüsusi təyinatlı qüvvələri Krımdakı Kiyev tərəfdarı müqavimət qrupları ilə koordinasiyalı fəaliyyət göstərərək əsas logistika körpüsünə və 60-dan çox Rusiya hərbi obyektinə zərbələr endirib.

Məlumata əsasən, hücumlar Kerç boğazının hər iki tərəfində yerləşən hədəflərə qarşı həyata keçirilən pilotsuz uçuş aparatı və raket zərbələrinin davamı olub.

Ukrayna mənbələri əməliyyatın Krımın Rusiya ilə logistika əlaqələrinin zəiflədilməsinə yönəldiyini bildirirlər.

Onların sözlərinə görə, hücumlar Rusiyanın Krımı ilhaq etməsindən sonra formalaşdırdığı hərbi infrastruktur üçün ciddi problem yaradıb.

Ukrayna Prezidenti Volodimir Zelenski isə bildirib ki, Rusiya Prezidenti Vladimir Putin hava hücumundan müdafiə sistemlərini Moskva və Kerç körpüsü ətrafına daha yaxın yerləşdirməyə başlayıb.

Məlumata görə, Ukrayna son aylarda uzaqmənzilli zərbələr vasitəsilə Rusiyanın enerji və hərbi infrastrukturuna təzyiqi artıraraq bu əməliyyat üçün zəmin hazırlayıb.

Sevinc Əliyeva
Ordu.az