Ordu.az xəbər verir ki, “Thales” şirkəti Robert Geklin 2026-cı il iyulun 1-dən etibarən “Thales USA” və “Thales North America” şirkətlərinin baş icraçı direktoru vəzifəsinə təyin edib.

Keçmişdə “Airbus U.S. Space & Defense” şirkətinin rəhbəri olmuş Gekl Şimali Amerikada şirkətin strategiyasına və əməliyyat fəaliyyətinə rəhbərlik edəcək.

“Thales Group”un baş direktoru Patris Keyn bildirib ki, Robert Geklin müdafiə sənayesi və dövlət sektorunda qazandığı təcrübə şirkətin ABŞ və Kanada bazarlarında inkişafına mühüm töhfə verəcək.

Şirkətin hazırkı rəhbəri Alan Pelleqrini isə iyunun 30-da vəzifəsindən ayrılacaq. O, 2026-cı ilin sonuna qədər keçid prosesinə dəstək vermək üçün şirkətdə qalacaq.

Digər tərəfdən, “1Kosmos” şirkəti kibertəhlükəsizlik sahəsinin tanınmış mütəxəssisi Rocer Heyli informasiya təhlükəsizliyi üzrə baş direktor vəzifəsinə təyin edib.

Şirkət rəhbərliyi bildirib ki, Heylin təcrübəsi identifikasiya və parolsuz autentifikasiya həllərinin genişləndirilməsi prosesində mühüm rol oynayacaq.

Rocer Heyl qeyd edib ki, müasir dövrdə kibercinayətkarlar hesabların bərpası, cihazların qeydiyyatı və imtiyazlı girişlər kimi sahələri hədəfə alırlar. Buna görə də təsdiqlənmiş rəqəmsal identifikasiya mexanizmləri xüsusi əhəmiyyət daşıyır.

Bundan başqa, Latın Amerikasının ən böyük rəqəmsal identifikasiya şəbəkəsi hesab edilən “Unico” şirkəti Kassio Vakeronu Strateji Tərəfdaşlıqlar Direktoru vəzifəsinə təyin edib.

Şirkət rəhbərliyinin sözlərinə görə, Vakeronun əsas vəzifəsi tərəfdaş şəbəkəsini genişləndirmək və xüsusilə ABŞ bazarında şirkətin mövqeyini gücləndirmək olacaq.

25 illik beynəlxalq biznes inkişafı təcrübəsinə malik olan Vakero “Unico”nun rəqəmsal identifikasiya və fırıldaqçılığın aşkarlanması texnologiyalarının daha geniş tətbiqinə dəstək verəcək.

Şirkət məlumatına görə, “Unico”nun həyata keçirdiyi identifikasiya əməliyyatlarının həcmi 2026-cı ilin ilk rübündə əvvəlki ilin eyni dövrü ilə müqayisədə 84 faiz artıb.

Sevinc Əliyeva
Ordu.az