Ordu.az xəbər verir ki, bu barədə “Associated Press” agentliyi məlumat yayıb.

Söhbət “Şinçonci Kilsəsi”nin 95 yaşlı qurucusu Li Man Hidən gedir.

İstintaqın məlumatına görə, o, on minlərlə tərəfdarını hakim mühafizəkar “Xalqın Gücü” partiyasına üzv olmağa qanunsuz şəkildə cəlb etməkdə şübhəli bilinir. Məqsədin seçkilərin nəticələrinə və partiyadaxili ilkin səsvermələrə təsir göstərmək olduğu iddia edilir.

Məhkəmə sübutların məhv edilməsi ehtimalını əsas gətirərək həbs qərarı çıxarıb.

Li Man Hi Seul məhkəməsinə əsaya söykənərək və köməkçilərinin müşayiəti ilə gəlsə də, jurnalistlərin suallarını cavablandırmayıb.

Kilsə rəhbərliyi onun yaşı və səhhəti ilə bağlı narahat olduqlarını bildirərək məhkəmə qərarını hələlik şərh etməyib.

İstintaqın iddiasına görə, 2021-2024-cü illər arasında təşkilatın regional bölmələri vasitəsilə 50 mindən çox tərəfdar partiyaya üzv olmağa məcbur edilmiş ola bilər.

Prokurorluğun versiyasına əsasən, kampaniyanın məqsədi prezident və parlament seçkilərinə təsir göstərmək, həmçinin kilsə infrastrukturlarının genişləndirilməsi üçün icazələr də daxil olmaqla siyasi və inzibati üstünlüklər əldə etmək olub.

Araşdırma Cənubi Koreyada dini təşkilatların siyasətə mümkün təsiri ilə bağlı daha geniş istintaqın bir hissəsi hesab olunur.

1984-cü ildə yaradılmış “Şinçonci Kilsəsi” ittihamları rədd edir və təşkilatın təxminən 200 min üzvünün olduğunu bildirir.

Bununla yanaşı, təşkilat həm Cənubi Koreyada, həm də xaricdə tez-tez tənqid olunur və bir çox hallarda dini təriqət kimi xarakterizə edilir.

Sevinc Əliyeva
Ordu.az