Ordu.az xəbər verir ki, bu barədə “Taipei Times” nəşri məlumat yayıb.

Məlumata görə, Tayvan ordusu və “General Atomics Aeronautical Systems” şirkəti tərəfindən həyata keçirilən işlər çərçivəsində ilk MQ-9B platformasının yığılması davam edir. Uçuş sınaqları başa çatdıqdan sonra sistemin əməliyyat xidmətinə qəbul olunması planlaşdırılır.

Tayvan 2020-ci ildə ABŞ tərəfindən təsdiqlənmiş Xarici Hərbi Satışlar proqramı çərçivəsində dörd ədəd MQ-9B “SkyGuardian” PUA-sı sifariş etmişdi. Təhvilin 2026 və 2027-ci illərdə iki mərhələdə həyata keçirilməsi nəzərdə tutulur.

MQ-9B “SkyGuardian” Tayvanın son illərdə silahlanmasına qəbul etdiyi ən mühüm kəşfiyyat və müşahidə platformalarından biri hesab olunur.

Orta hündürlükdə uzunmüddətli uçuş imkanına malik platforma 40 saatdan artıq havada qala bilir. Bu xüsusiyyət ona Tayvan boğazı, Başi kanalı, eləcə də Şərqi və Cənubi Çin dənizində fasiləsiz kəşfiyyat və müşahidə aparmağa imkan verir.

“General Atomics” tərəfindən hazırlanmış MQ-9B əvvəlki MQ-9A “Reaper” variantları ilə müqayisədə əhəmiyyətli təkmilləşdirmələrə malikdir. NATO-nun hava təhlükəsizliyi standartlarına uyğun layihələndirilən platforma qabaqcıl “Detect and Avoid” sistemi sayəsində mülki hava məkanında da təhlükəsiz fəaliyyət göstərə bilir.

Təxminən 24 metr qanad açıqlığına malik MQ-9B 40 min futdan artıq hündürlükdə uçuş həyata keçirə bilir.

“Honeywell TPE331” turboprop mühərriki ilə təchiz edilən platforma elektro-optik, infraqırmızı, dəniz müşahidə və sintetik aperturalı radar sensorları daşıya bilir. Bu imkanlar sayəsində müxtəlif hava şəraitində dəniz vasitələrini, hava hədəflərini və yerüstü obyektləri aşkar edib izləmək mümkündür.

Mütəxəssislər hesab edirlər ki, MQ-9B-nin təmin edəcəyi fasiləsiz müşahidə imkanları Çinin son illərdə Tayvan ətrafında artırdığı hava və dəniz fəaliyyətlərinin izlənilməsində mühüm rol oynayacaq.

Sevinc Əliyeva
Ordu.az