Ordu.az xəbər verir ki, bu barədə nazirliyin yayımladığı rəsmi bəyanatda bildirilib.
Sənəddə vurğulanıb ki, düşmən dövlətlər döyüş meydanındakı məğlubiyyətlərini İran əleyhinə “gizli kəşfiyyat-təhlükəsizlik müharibəsi”ni gücləndirməklə kompensasiya etməyə çalışırlar.
“Ənənəvi müharibədə məğlub olan düşmən heç olmasa “yumşaq müharibə” üsulları ilə müəyyən nəticələr əldə etməyə çalışır”, - deyə bəyanatda qeyd olunub.
Nazirlik əlavə edib ki, son silahlı qarşıdurma zamanı rəqiblər açıq şəkildə dövlət quruluşunun devrilməsi və İranın parçalanması məqsədi güdürdülər. Lakin onlar bu planları birbaşa hərbi zərbələrlə həyata keçirə bilməyiblər.
Kəşfiyyat Nazirliyinin təhlilinə görə, hazırda İranın rəqibləri əsas diqqəti dövlətin daxili sabitliyini pozmağa yönəlmiş “yumşaq, koqnitiv və hibrid müharibə sahəsindəki sui-qəsdlərə” yönəldiblər.
Qurum düşmən fəaliyyətinin əsas istiqamətləri kimi iqtisadi sabotaj, daxili qarşıdurmaların qızışdırılması və informasiya müharibəsini göstərib.
Bildirilib ki, iqtisadi sabotaj çərçivəsində sanksiya təzyiqi gücləndirilir, inflyasiya və məhsul çatışmazlığından sosial iğtişaşların yaradılması məqsədilə istifadə olunur.
Nazirlik iddia edib ki, bu məqsədlə “düşmən agentləri və xaricdən idarə olunan farsdilli media resursları” cəlb edilir.
Qeyd olunub ki, İran daxilində etnik və dini gərginliyi artırmaq cəhdləri də müşahidə olunur. Məqsəd müxtəlif etnik qruplar və rəsmi tanınan dini icmalar arasında milli birliyi zəiflətməkdir.
Nazirlik həmçinin BBC Persian, “Voice of America” və “Iran International” daxil olmaqla xaricdə fəaliyyət göstərən farsdilli media qurumlarını ölkəyə qarşı aparılan dağıdıcı fəaliyyətə informasiya dəstəyi verməkdə ittiham edib.
Bəyanatda “sionistlər tərəfindən dəstəklənən terror qruplaşmalarının” İranın şimal-qərb və cənub-şərq sərhəd bölgələrinə diversiya və hücum əməliyyatları həyata keçirmək üçün yönləndirildiyi də qeyd olunub.
Kəşfiyyat məlumatlarına görə, bu qruplaşmalar son müharibə zamanı koordinasiyalı quru hücumları həyata keçirməyə cəhd göstərsələr də, İran Silahlı Qüvvələri onların mövqelərini aşkar etdikdən sonra geri oturdulublar.
Nazirlik hazırkı mərhələdə milli təhlükəsizlik üçün əsas təhdidlər kimi sifarişli qətllərin və diversiyaların təşkili, ölkəyə silah qaçaqmalçılığı, genişmiqyaslı kiberhücumlar, eləcə də “Starlink” peyk internet terminalları daxil olmaqla qanunsuz rabitə vasitələrinin qeyri-qanuni idxalı və yayılmasını göstərib.
Sevinc Əliyeva
Ordu.az
