Ordu.az xəbər verir ki, bu barədə “Press TV” məlumat yayıb.

Pezeşkian vurğulayıb ki, düşmən dövlətlərin başlatdığı “iqtisadi müharibə”nin əsas zərbəsi məhz özəl sektorun üzərinə düşür.

Çərşənbə günü Tehran Ticarət, Sənaye, Mədən və Kənd Təsərrüfatı Palatasında sahibkarlar, tacirlər və özəl sektor nümayəndələri ilə görüşdə çıxış edən İran Prezidenti dövlətin inzibati maneələri aradan qaldırmaq və sabit iqtisadi fəaliyyət üçün bütün zəruri şəraiti yaratmaq niyyətində olduğunu bildirib.

“Bu gün əsas qarşıdurma meydanı iqtisadiyyat və insanların həyat keyfiyyətidir. Bu iqtisadi müharibənin əsas yükü tacirlərin, kommersantların, istehsalçıların və özəl sektor nümayəndələrinin üzərinə düşür”, - deyə Pezeşkian qeyd edib.

Prezident əlavə edib ki, rəqib tərəf hərbi sahədə məqsədlərinə nail ola bilmədiyi üçün indi ölkənin iqtisadi liderlərini tükəndirməyə çalışır.

“Düşmən istəyir ki, iqtisadi müharibənin ön cəbhəsində olan iqtisadi fəallar, sahibkarlar və tacirlər zərərə uğrasın və zəifləsin. Lakin hökumət özəl sektorun zəifləməsinə imkan verməyəcək”, - deyə o vurğulayıb.

Pezeşkian bildirib ki, İranın “qırmızı xətləri” dəyişməz olaraq qalır və özəl sektor dövlət üçün yalnız tərəfdaş deyil, həm də milli gücün əsas dayaqlarından biridir.

“Əminik ki, özəl sektor nə qədər çevik, aktiv və funksional olsa, ölkənin iqtisadi təməli bir o qədər güclü olacaq və xarici təzyiq və təhdidlər şəraitində milli güc daha da artacaq”, - deyə İran Prezidenti qeyd edib.

Sevinc Əliyeva
Ordu.az