Ordu.az xəbər verir ki, hərbi qiymətləndirmələr zamanı mövcud ehtiyatlarda çatışmazlıq müəyyən edildikdən sonra Taypey rəhbərliyi yeni alış planlarını təsdiqləyib.
Yeni qəbul edilən müdafiə büdcəsi çərçivəsində Tayvan administrasiyası 24 əlavə TOW buraxılış qurğusu və 1 545 ədəd TOW 2B tank əleyhinə raketi tədarük etməyi planlaşdırır.
Tədarüklərin 2029-cu ildə başlaması nəzərdə tutulur. Bu alışla birlikdə Tayvan administrasiyasının ümumi TOW ehtiyatının 124 buraxılış qurğusu və 3 245 raket səviyyəsinə çatacağı gözlənilir.
Taypey əlavə olaraq 70 ədəd “Javelin” buraxılış qurğusu və 1 050 ədəd “Javelin” tank əleyhinə raketi üçün də təşəbbüs başladıb. Təhvilatların 2031-ci ildə başlaması planlaşdırılır və proses tamamlandıqdan sonra “Javelin” ehtiyatının 112 buraxılış qurğusu və 1 450 raketə çatacağı bildirilir.
Bu addım son “Han Kuang” hərbi təlimlərindən sonra aparılan qiymətləndirmələrin ardınca atılıb. Təlim nəticələrində Tayvan administrasiyasının genişmiqyaslı amfibiya çıxarması və ya mexanikləşdirilmiş hücum ssenarilərinə qarşı tank əleyhinə imkanlarının əməliyyat ehtiyaclarını qarşılamaqda qeyri-kafi olduğu qeyd olunub.
Məlumata görə, amerikalı hərbi müşavir qrupları da döyüş hazırlığını artırmaq məqsədilə daha genişmiqyaslı fəaliyyət çərçivəsində tank əleyhinə silah ehtiyatlarının artırılmasını tövsiyə edib.
Tayvan administrasiyasının Müdafiə Nazirliyi isə daha əvvəl sifariş edilən bütün BGM-71 TOW 2B və FGM-148 “Javelin” raketlərinin təhvil alındığını və əməliyyat bölmələrinə paylandığını açıqlayıb.
Əvvəlki tədarük paketləri çərçivəsində Tayvan administrasiyasının 1 700 ədəd TOW 2B və 400 ədəd “Javelin” raketi aldığı qeyd olunub. TOW 2B 4 500 metrə qədər mənzilə malik uzaqmənzilli tank əleyhinə raket sistemi kimi seçilir.
Zirehli maşınlara qarşı yuxarıdan zərbə konsepsiyası ilə hazırlanan sistemin yalnız tanklara qarşı deyil, istehkam mövqeləri, amfibiya çıxarma vasitələri və desant gəmilərinə qarşı da istifadə oluna bildiyi vurğulanıb.
Çiyindən atılan “Javelin” isə piyadalara daha mobil tank əleyhinə həll təqdim edir. “Atdım-unutdum” idarəetmə sistemi sayəsində operatorlar atışdan dərhal sonra sığınacaq ala bilir. Raketin hücum profilinin müasir zirehli maşınların zəif nöqtələrini hədəf alacaq şəkildə hazırlandığı qeyd olunub.
Planlaşdırılan yeni alışların Tayvan administrasiyasının Çindən gələn artan hərbi təzyiqə qarşı asimmetrik müdafiə strategiyasını gücləndirmək səylərinin bir hissəsi olduğu bildirilir. Pekin Tayvanı öz ərazisi hesab edir və ada üzərindəki suverenlik iddiasını gücləndirmək məqsədilə hərbi təzyiqi artırır, eyni zamanda güc tətbiqini də istisna etmir.
Mövzunun ABŞ silah tədarükləri ilə bağlı sualların gündəmdə olduğu dövrə təsadüf etdiyi qeyd olunub. Bu ayın əvvəlində ABŞ Hərbi Dəniz Qüvvələrinin müvəqqəti naziri Hunq Kao Konqres üzvlərinə açıqlamasında Tayvan administrasiyasına nəzərdə tutulan gözləyən silah satışları da daxil olmaqla bəzi xarici hərbi satışların Yaxın Şərqdə davam edən əməliyyatlar üçün kifayət qədər sursat ehtiyatının qorunması məqsədilə müvəqqəti dayandırıldığını bildirib.
Buna baxmayaraq, Taypey rəhbərliyi Vaşinqtonun mövcud silah satış öhdəliklərində dəyişiklik etməyi planlaşdırdığına dair heç bir bildiriş almadığını açıqlayıb.
Sevinc Əliyeva
Ordu.az
