Ordu.az xəbər verir ki, bu barədə “Rostec” məlumat yayıb.
Bildirilib ki, təhvil Ukrayna müharibəsinin dördüncü ilinə yaxınlaşdığı dövrdə Rusiyanın döyüş təyyarəsi istehsalını davam etdirdiyini göstərir. Şirkət təhvil verilən təyyarələrin sayını açıqlamayıb, lakin “Su-35S” istehsal xəttinin Qərb sanksiyalarına baxmayaraq fəaliyyətini davam etdirdiyini vurğulayıb.
Açıq mənbə kəşfiyyat platforması “Oryx”in vizual sübutlara əsaslanan məlumatına görə, Rusiya 2022-ci ildən etibarən ən azı 140 döyüş təyyarəsi itirib. Bu itkilər arasında ən azı 8 “Su-35S” döyüş təyyarəsinin olduğu bildirilib. Rusiyanın ən qabaqcıl seriya istehsalı döyüş təyyarələrindən biri hesab olunan “Su-35S” “4++ nəsil” sinfinə məxsus platforma kimi təqdim edilir.
Təyyarə qabaqcıl radar sistemi, yüksək manevr qabiliyyəti və uzaqmənzilli “hava-hava” nişanalma imkanları ilə seçilir. “Su-35S”də istifadə olunan AL-41F1S mühərriklərinin üçölçülü itələmə yönləndirmə sistemi sayəsində yaxın hava döyüşlərində ciddi manevr üstünlüyü təmin etdiyi qeyd olunub.
“Rostec” açıqlamasında rus pilotun fikirlərinə də yer verilib. Pilot bildirib ki, “Su-35S” müxtəlif tapşırıqlarda aktiv istifadə olunur. “Su-35S” yüksək manevr qabiliyyətinə malik çoxfunksiyalı döyüş təyyarəsidir. Bu platforma ilə uzaqmənzilli hava hədəflərini qarşılayır, hücum qruplarını qoruyur, pilotsuz uçuş aparatlarını məhv edir və yüksək dəqiqlikli sursatlarla quru və dəniz hədəflərinə zərbələr endiririk”, - deyə pilot bildirib.
Onun sözlərinə görə, təyyarə cəbhə xəttinin dərinliklərində kəşfiyyat tapşırıqları üçün də istifadə olunur.
Qeyd olunub ki, Qərb ölkələri 2022-ci ildə başlayan Ukrayna müharibəsindən sonra Rusiyanın aviasiya sektoruna qarşı genişmiqyaslı sanksiyalar tətbiq edib.
Xüsusilə mikroelektronika, avionik komponentlər və istehsal avadanlıqlarına çıxışın məhdudlaşdırılması hədəflənib. Buna baxmayaraq Rusiyanın döyüş təyyarəsi istehsalını davam etdirməsi mövcud ehtiyat hissələri, üçüncü ölkələr vasitəsilə həyata keçirilən paralel idxal kanalları və yerli əvəzetmə proqramları ilə əlaqələndirilir.
Sevinc Əliyeva
Ordu.az
