Ordu.az xəbər verir ki, “Thales” şirkəti tərəfindən hazırlanan “Martlet” silah sistemi 2020-ci ildən etibarən “Wildcat” helikopterlərində istifadə olunur.

Son sınaqlar raketin əməliyyat imkanlarının daha da genişləndirildiyini göstərib. Bu çərçivədə “Martlet” daha əvvəl 152 metr yüksəklikdən həyata keçirilən atışlardan fərqli olaraq, 15 metr kimi çox aşağı hündürlükdən uğurla buraxılıb.

“Martlet” Böyük Britaniyanın FASGW proqramı çərçivəsində hazırlanıb və dənizdə və havada yerləşən kiçik, yüksək sürətli hədəflərə qarşı istifadə üçün nəzərdə tutulub.

“Thales” şirkətinin məlumatına görə, aşağı yüksəklikdən atəş açmaq qabiliyyəti “Wildcat” heyətinə əlverişsiz hava şəraitində daha effektiv fəaliyyət göstərməyə imkan verir.

Bununla yanaşı, kiçik dəniz hədəflərinə qarşı daha dəqiq nişanalma imkanı təmin olunur.

Bu yenilikdən sonra “Martlet” raketi “Wildcat” helikopterləri üçün pilotsuz uçuş aparatlarına qarşı əməliyyatlarda, sürətli sahil hücum katerlərinə qarşı nişanalmada və dəqiq zərbə tapşırıqlarında əsas hava platformalı silah sisteminə çevrilib.

“Wildcat Maritime Force” komandanı Endryu Henderson bildirib ki, bu sistem suüstü gəmilərdən hava təhdidlərinə və pilotsuz uçuş aparatlarınadək müxtəlif hədəfləri yüksək dəqiqliklə zərərsizləşdirməyə imkan verir.

Qeyd olunub ki, Böyük Britaniya “Wildcat” parkını müdafiə imkanlarını artırmaq üçün sınaq və inteqrasiya fəaliyyətlərində aktiv şəkildə istifadə etməyə davam edir. Mart ayında London İran mənşəli pilotsuz uçuş aparatı təhdidlərinə qarşı əlavə lazerlə idarə olunan “Martlet” çoxməqsədli raketlərinin alınacağını açıqlamışdı.

Həmin raketlər hazırda Kiprdə yerləşdirilmiş “Wildcat” HMA2 helikopterlərində istifadə olunur.

Sevinc Əliyeva
Ordu.az