ABŞ tərəfi başqa mühüm məlumat yaymayıb. Bu isə Trampın Çin səfərinin əsas məqsədinin İran və ümumilikdə Yaxın Şərqdəki vəziyyətlə bağlı Pekinin ən azı loyal mövqeyini təmin etmək olduğunu göstərir. Görünən odur ki, o, bu məqsədinə nail olub.

ABŞ prezidentinin Çin səfəri ilə, sanki onun Ukrayna nizamlanması üzrə vasitəçiliyi də başa çatıb. Pekinə yola düşməzdən əvvəl Tramp Donbasdan Ukrayna qoşunlarının çıxarılması məsələsində Rusiya prezidenti ilə razılığa gəldiyi barədə məlumatı təkzib edib. Si Cinpinlə keçirdiyi danışıqlardan sonra isə Rusiyanın “RİA Novosti” agentliyi redaksiya məqaləsində ötən il Ankoricdə “əldə edilmiş razılaşmalardan yalnız tüstünün qaldığını” bildirib.

Məqalə müəllifi həmin “tüstünü” müsbət qiymətləndirib. Onun fikrincə, “yorucu müharibə şəraitində dünyanın iki aparıcı iqtisadiyyatından birini düşməndən rəqibə çevirmək istənilən bəyanatdan daha qiymətlidir”.

Burada, şübhəsiz ki, söhbət Ukraynaya maliyyə dəstəyini dayandırmış ABŞ-dən gedir. Fakt budur ki, ABŞ silahları Avropa ölkələri vasitəsilə və onların birbaşa ödənişləri hesabına Ukraynaya çatdırılır.

Nəşrin məlumatına görə, Tramp “Zelenskini razı salmağa çalışıb, lakin buna nail olmayıbsa, bu, faciə deyil”. Çünki Rusiya prezidentinin köməkçisi Uşakov bildirib ki, Kiyevdə “müharibənin başa çatması üçün nə edilməli olduğunu yaxşı bilirlər”. “RİA Novosti” əlavə edib ki, “söhbət bütün ərazilərdən gedir”.

ABŞ-nin Ukrayna nizamlanması prosesindən çıxmasının Rusiyanın, yoxsa Ukrayna və onun Avropadakı müttəfiqlərinin əl-qolunu açmaq məqsədi daşıdığını müəyyənləşdirmək çətindir. Lakin görünən odur ki, Tramp, Si Cinpin və Putin yeni dünya düzəninin “memarları”na çevrilməyəcəklər.

Ukraynada müharibə, böyük ehtimalla, davam edəcək. Trampın Çin lideri ilə keçirdiyi “möhtəşəm” görüş bəlkə də noyabrda keçiriləcək Konqres aralıq seçkiləri üçün bir növ “avans” rolunu oynayır. Amma Ukraynaya qarşı müharibənin yay mərhələsi Putinə nə qazandıracaq, bu, hələ də ciddi qeyri-müəyyən olaraq qalır.

Asif Cəfərov
Ordu.az