Ordu.az xəbər verir ki, 2026-cı il iyunun 5-də imzalanan müqaviləyə əsasən, Merilend ştatında yerləşən “Machining Technologies Inc.” və Minnesota ştatında fəaliyyət göstərən “Globe Tech LLC” şirkətləri layihədə iştirak edəcək.

ABŞ ordusu 2031-ci ilə qədər davam edəcək proqram çərçivəsində ehtiyacdan asılı olaraq hər iki şirkətdən sifarişlər verəcək. Dörd təklifin qiymətləndirildiyi tender prosesindən sonra seçilən iki şirkət müqavilə çərçivəsində veriləcək hər bir sifariş üzrə bir-biri ilə rəqabət aparacaq.

Minaatan sursatlarının vacib komponenti

Müqavilə ABŞ Quru Qoşunları və Dəniz Piyadaları tərəfindən istifadə olunan 60 mm, 81 mm və 120 mm minaatan sursatlarının quyruq stabilizatorlarını əhatə edir. Quyruq stabilizatorları sursatın uçuş zamanı sabit qalmasını və hədəfə dəqiq istiqamətlənməsini təmin edən əsas komponentlərdən hesab olunur.

Yüksək dəqiqlik tələb edən bu hissələr sursatın uçuş xüsusiyyətlərinə birbaşa təsir göstərir. Ölçü normativlərindən kənaraçıxmalar və ya istehsal qüsurları sursatın hədəfdən yayınmasına, eləcə də təhlükəsizlik risklərinin yaranmasına səbəb ola bilər.

İki təchizatçı modeli seçilib

ABŞ ordusu müqavilə çərçivəsində iki ayrı istehsalçının cəlb olunması ilə sursat təchizat zəncirinin dayanıqlığını artırmağı hədəfləyir.

Rusiya-Ukrayna müharibəsindən sonra Qərb ölkələrində sursat ehtiyatları və istehsal imkanları ilə bağlı qiymətləndirmələrin intensivləşməsi fonunda Vaşinqton kritik sursat komponentlərində tək istehsalçıdan asılılığın azaldılması istiqamətində addımlar atır.

Bu çərçivədə eyni məhsul üzrə iki şirkətin səlahiyyətləndirilməsi istehsal xəttində yarana biləcək mümkün problemlərin təchizat zəncirinə təsir etmədən aradan qaldırılmasını nəzərdə tutur.

Sevinc Əliyeva
Ordu.az